Britaniya BMT XKda Rossiyaning Skripal ishi bo‘yicha tashabbusini blokladi

Buyuk Britaniya BMT Xavfsizlik kengashida Rossiya tomonidan taklif etilgan bayonot loyihasini bloklab qo‘ydi. Bu haqda RIA «Novosti» Rossiya doimiy vakolatxonasiga asosan xabar bermoqda.

Aniqlik kiritilishicha, gap GRU sobiq polkovnigi Sergey Skripal va uning qizi zaharlangan Britaniyaning Solsberi shahridagi hodisa bo‘yicha bayonot loyihasi haqida ketyapti.

«Rossiya tomonidan BMT Xavfsizlik kengashining 14 mart kungi yig‘ilishida taklif etilgan, kengashning matbuot uchun qisqa va faktologik bayonoti loyihasi Buyuk Britaniya vakillari tomonidan bloklab qo‘yildi. U Britaniyada yuz bergan va katta mojaroga olib kelgan kimyoviy hodisani madaniyatli tarzda, tezkor surishtiruvdan o‘tkazishga chaqirishi kerak edi hamda bu tegishli tashkilot (Kimyoviy qurolni taqiqlash tashkiloti) standartlariga muvofiq amalga oshirilishi lozim edi. Biroq, u qo‘pol ravishda, siyosiy sabablar bilan bloklab qo‘yildi», - deyiladi xabarda.

Eslatib o‘tamiz, 14 mart kuni Buyuk Britaniyaning talabi bilan BMT Xavfsizlik kengashining yig‘ilishi bo‘lib o‘tdi.