O‘zbekiston va Qirg‘iziston TIV 2019 yilgacha hamkorlik dasturini imzoladi

2018 yilning 28 mart kuni O‘zbekiston Respublikasi tashqi ishlar vaziri Abdulaziz Komilov Afg‘oniston bo‘yicha «Tinchlik jarayoni, xavfsizlik sohasida hamkorlik va mintaqaviy sheriklik» mavzusidagi xalqaro konferensiyada ishtirok etish uchun Toshkent shahriga kelgan Qirg‘iziston Respublikasi tashqi ishlar vaziri Erlan Abdildayev bilan uchrashdi. Bu haqda TIV axborot xizmati xabar bermoqda.

Vazirlar 27 mart kuni nihoyasiga yetgan Toshkent forumi natijalari yuzasidan fikr almashdilar.

Qirg‘iziston TIV rahbari ta'kidlaganidek, konferensiyaning muvaffaqiyatli yakunlanishi Afg‘oniston mojarosining tezda hal etilishi uchun konstruktiv asos yaratdi.

Suhbat chog‘ida ikki tomonlama va mintaqaviy kun tartibining dolzarb masalalari ham muhokama qilindi.

Muzokaralar yakuniga ko‘ra Abdulaziz Komilov va Erlan Abdildayev tomonidan O‘zbekiston va Qirg‘iziston tashqi siyosat idoralari o‘rtasida 2018-2019 yillarga mo‘ljallangan Hamkorlik dasturi imzolandi.