O‘zbekistonlik jurnalist va blogerlar Mail.ru Group kompaniyasiga qarashli Odnoklassniki ijtimoiy tarmog‘ining Moskvadagi ofisiga tashrif buyurishdi.
Maslov Piar kompaniyasi tomonidan tashkillashtirilgan mazkur media-turda Kun.uz axborot agentligi vakillari ham ishtirok etishdi.
Odnoklassniki ijtimoiy tarmog‘i 2006 yilning mart oyida veb-dasturchi Albert Popkov tomonidan ishga tushirilgan. Kompaniyaning dastlabki oylardagi auditoriyasi soni 1,5 millionni tashkil etgan bo‘lsa, 2017 yil iyul oyida foydalanuvchilar soni 4 millionga yetadi.
Hozirda OK.Ru tarmog‘i Mail.ru Group xolding kompaniyasiga tegishli bo‘lib, mazkur kompaniyani Alisher Usmonov boshqaradi.
Sayohatning birinchi kunida tashkilotchilar Moskva shahrining diqqatga sazovor joylari bilan tanishtirishdi. Jurnalistlar Kreml, Qizil maydon, shuningdek, yangi qurib bitkazilgan zamonaviy bog‘ kabi ko‘ngilochar maskanlarni tomosha qilishga muvaffaq bo‘lishdi.
Ma'lumot o‘rnida: OK.Ru ijtimoiy tarmog‘iga O‘zbekistonda bir oyda 1,8 million foydalanuvchi tashrif buyuradi. Kunlik auditoriya esa 644 mingni tashkil etadi. 2018 yil hisobotlariga ko‘ra, O‘zbekiston Odnoklassnikidan eng ko‘p foydalanuvchi mamlakatlar orasida Belarus hamda Qozog‘istondan so‘ng uchinchi o‘rinda turadi.
Media-tur mavzusi OK.Ru saytining faoliyatiga bag‘ishlandi. Tadbirda O‘zbekiston delegatsiyasidan tashqari, Belarusdan tashrif buyurgan jurnalistlar ham qatnashishdi.
OK.Ru sayti Mail.ru Group kompaniyasining idorasida joylashgan bo‘lib, mehmonlar binoni ekskursiya qilishdi. Zamonaviy jihozlar, betakror dizayn, qulay shart-sharoitlar – har qanday insonni hayratga sola oladi.
Mail.ru Group kompaniyasi Leningrad prospektida qad rostlagan yangi 27 qavatli binoga 2017 yilning avgust oyida ko‘chib o‘tdi. Binoning pastki qavatida 30 ming kv. metr maydonni egallovchi mashinalar parkovkasi mavjud.
Yangi bosh idoraning loyihasi maxsus tanlov natijasida ishlab chiqilgan. Bellashuvda 19ta kompaniyalar ishtirok etgan bo‘lib, ular orasida UNK Project eng munosibi deb topilgan. Loyihaning bosh arxitektori Nikolay Milovidovning qayd etishicha, asosiy urg‘u ishchilar uchun maksimal darajadagi erkin va jonli makonni ta'minlashga qaratilgan.
Idora oupenspeys tamoyili ostida qurilgan bo‘lib, xodimlarga Moskvaning go‘zal tarovatini tomosha qilishga imkon beradi. Bundan tashqari, binoda ishlash va dam olish uchun ko‘plab qo‘shimcha maydonlar mavjud: ko‘p funksional mobil zallar, fitnes-markaz, launj-hudud, kinoteatr va boshqalar. Birinchi qavatdagi odatiy zalda stritbol o‘ynash, samolyot uchirish va Segway’da uchish imkoni bor.
Idora bo‘ylab uyushtirilgan ajoyib ekskursiyadan so‘ng, OK.ru vakillari Semen Boyarskiy (OK strategik mahsulotlarini rivojlantirish bo‘yicha rahbari), Aleksey Kashevarov (OK biznesni rivojlantirish bo‘limi rahbari) va Sergey Tomilov (OK matbuot xizmati rahbari) bilan brifing tashkil etildi. Uchrashuv davomida OK.ru saytini yanada takomillashtirish, foydalanuvchilar qiziqishini orttirish ustida olib borilayotgan ishlar va kelgusidagi maqsad-vazifalar to‘g‘risida alohida to‘xtalib o‘tildi. Kompaniya rahbariyati ijtimoiy tarmoqda kutilayotgan ajoyib yangiliklar haqida o‘rtoqlashishdi.
OK.ru saytining vakillari O‘zbekiston media-bozoriga katta qiziqish bildirishdi va hamkorlik masalalari bo‘yicha takliflar berishdi. Shundan so‘ng, jurnalistlar o‘zlari qiziqtirgan savollarga javoblar olishdi.
Mazkur media-safar juda ham a'lo kayfiyatda o‘z yakuniga yetdi. O‘zaro hamkorlik bo‘yicha kelishib olindi.
