Moskvada Gagarin mashq qilgan barokamerani o‘g‘irlab ketishdi

Moskva shahri huquqni muhofaza qilish organlari xodimlari Stroginodagi qo‘riqlanadigan turargohdan Kosmonavtika muzeyi eksponati – Yuriy Gagarin mashg‘ulotlar o‘tkazgan barokamerani o‘marib ketgan noma'lum shaxslarni izlamoqda. Bu haqda «Moskva» yangiliklar agentligi manbaga asosan xabar berdi.

«Politsiyaga arizachi murojaat qildi, u Kosmonavtika muzeyida parvozlarga tayyorgarlik ko‘rish sohasi eksperti sifatida ishlashini aytdi. Uning bildirishicha, Stroginodagi 1-Likovskaya ko‘chasida joylashgan turargohda muzey eksponati yo‘q ekanini aniqlagan. Ushbu holat bo‘yicha jinoiy ish qo‘zg‘atildi. Yetkazilgan zarar miqdori 300 ming rublni tashkil etgan», - deya aytib o‘tdi manba.

Gap «Surdobarokamera 48» (SBK-48) haqida ketmoqda, u parvoz tarkibini baland masofalarda sinovdan o‘tkazish va turli tadqiqotlarni amalga oshirishga mo‘ljallangan. Gagarin unda 1960 yilning 26 iyulidan 5 avgustiga qadar shug‘ullangan.