Adliya vazirligi NHH loyihalari ustida ishlashda asosiy o‘rinni egallaydi

Prezidentning 13.04.2018 yildagi PQ–3666-son qarori bilan normativ-huquqiy hujjatlar loyihalarini QHTBT portalida jamoatchilik muhokamasiga qo‘yish hamda Prezident va Vazirlar Mahkamasiga kiritiladigan loyihalarni Adliya vazirligi bilan kelishish majburiyati joriy etilmoqda. Bu haqda Norma xabar berdi.
 
2018 yil 1 maydan boshlab normativ-huquqiy hujjatlar loyihalari bilan yangicha ishlash qoidalari amal qila boshlaydi.
 
Birinchidan, Yagona interaktiv davlat xizmatlari portalida (QHTBT) endi normativ-huquqiy hujjatlarning (bundan keyin – NHH) barcha loyihalari joylashtiriladi.
 
Ilgari Vazirlar Mahkamasining 2.12.2014 yildagi 328-son qarori bilan faqat tadbirkorlik faoliyatini amalga oshirishga ta'sir etadigan loyihalar bo‘yicha bunday muhokama qilish majburiyati belgilangan edi. U manfaatdor vazirlik va idoralar bilan kelishishdan oldin o‘tkaziladi. Bunda loyihani QHTBT portalida joylashtirish uchun aniq mezonlar Ishlab chiqilayotgan normativ-huquqiy hujjatlar loyihalarining va qabul qilingan normativ-huquqiy hujjatlarning tadbirkorlik faoliyatiga ta'sirini O‘zbekiston Respublikasining Interaktiv davlat xizmatlari yagona portali orqali baholash tartibi to‘g‘risidagi nizomning 4-bandida belgilangan edi.
 
Ikkinchidan, NHH loyihalari Adliya vazirligining huquqiy ekspertiza yakunlari bo‘yicha ularni qabul qilish maqsadga muvofiqligi to‘g‘risidagi xulosasi mavjud bo‘lgandagina Vazirlar Mahkamasi va Prezident devoniga kiritiladi. Bunda NHH loyihalarining huquqiy ekspertizasi ular manfaatdor vazirliklar bilan kelishilgandan keyin, shuningdek Vazirlar Mahkamasi va Prezident devonlari tarkibiy bo‘linmalarida loyihaning kontseptual qoidalari o‘zgartirilganda takroriy ravishda vazirlik tomonidan amalga oshiriladi.  
 
Ilgari O‘zbekiston Respublikasi Vazirlar Mahkamasining Reglamenti (Vazirlar Mahkamasining 14.02.2005 yildagi 62-son qaroriga ilova) va O‘zbekiston Respublikasi Prezidenti devonining Reglamenti (Prezidentning 28.07.2017 yildagi PQ–3161-son qaroriga ilova) bilan bunday ekspertiza nazarda tutilgan edi. Biroq Vazirlar Mahkamasi va Prezident devonlarida loyihaga qayta ishlov berilgandan keyin uni o‘tkazish majburiy bo‘lmagan.
 
Bunda NHH loyihasini ko‘rib chiqishga kiritish yoxud uni qabul qilish uchun Adliya vazirligining xulosasi ijobiy bo‘lishi shart emas (mahalliy davlat hokimiyati organlarining NHH loyihalaridan farqli ravishda, quyiga qarang).
 
Uchinchidan, loyihalari yuzasidan hududiy adliya organlari ijobiy xulosa bermagan normativ-huquqiy hujjatlarni mahalliy davlat hokimiyati organlari qabul qilishi amalda taqiqlandi.
 
Mahalliy davlat hokimiyati organlari tomonidan qabul qilinadigan normativ-huquqiy hujjatlar loyihalarini tayyorlash, yuridik-texnik rasmiylashtirish va huquqiy ekspertizadan o‘tkazish tartibi to‘g‘risida yo‘riqnomaga muvofiq bunday ekspertiza o‘tkazish ilgari ham majburiy edi. Biroq uning natijalari mahalliy Xalq deputatlari kengashlari va hokimlar normativ-huquqiy tusdagi qarorlar qabul qilishini cheklamas edi.  
 
To‘rtinchidan, vazirlik va idoralar, agar ularga qonun hujjatlari, Prezidentning farmonlari, qarorlari va farmoyishlari, Vazirlar Mahkamasining qarorlari bilan tegishli normativ-huquqiy hujjatni qabul qilish yoki muayyan ijtimoiy munosabatlarni huquqiy tartibga solish bo‘yicha vakolatlar berilgan bo‘lsa, idoraviy me'yoriy-huquqiy hujjatlarni qabul qilishlari mumkin.   
 
Ilgari vazirliklar, davlat qo‘mitalari va idoralar vakolatining bunday talqini adliya vazirining o‘zi tasdiqlagan Idoraviy normativ-huquqiy hujjatlarni tayyorlash va qabul qilish qoidalarida (28.02.2014 yilda 2565-son bilan ro‘yxatdan o‘tkazilgan) mavjud edi.  
 
Bundan tashqari, 1.01.2019 yildan boshlab O‘zbekiston hududida 17.06.1993 yilgacha qabul qilingan va Adliya vazirligida ro‘yxatdan o‘tkazilmagan idoraviy umummajburiy hujjatlar, shu jumladan sobiq Ittifoq idoraviy hujjatlarining amal qilishi to‘xtatiladi.
 
Hujjat 14.04.2018 yildan kuchga kirdi.