Inson manfaatlarini ta'minlash uchun, avvalo, odamlar bilan, xalq bilan muloqot qilish, ularning dardu tashvishlari, orzu-niyatlari, hayotiy muammo va ehtiyojlarini yaxshi bilish kerak bo‘ladi.
Shu maqsadda, Toshkent shahar adliya boshqarmasi tashabbusi bilan joriy yilning 16 aprel kuni Olmazor tumanining «Guruchariq» mahalla fuqarolar yig‘inida tumandagi fuqarolarining o‘z yechimini topmagan muammolarni o‘rganish va hal etish yuzasidan sayyor qabul hamda tarbiyasi og‘ir voyaga yetmagan shaxslar va ularning ota-onalari bilan uchrashuv o‘tkazildi.
Ushbu sayyor qabul va uchrashuvda Fuqarolarning o‘zini o‘zi boshqarish organlari faoliyatini muvofiqlashtirish bo‘yicha Toshkent shahar kengashi, Mirobod tuman hokimligi, prokuraturasi, ichki ishlar boshqarmasi, tibbiyot birlashmasi, xalq ta'limi bo‘limi, Yoshlar ittifoqi tuman kengashi, Toshkent shahar psixologlar assotsiatsiyasi va boshqa mutasaddi idora vakillari ishtirok etishdi.
Sayyor qabulga 62 nafar fuqarolar murojaat etib, shundan 38 nafariga murojaatidagi masalalar yuzasidan tushuntirishlar berilib, 24 nafar fuqaroning murojaatlari belgilangan tartibda kirim qilinib, ijrosi nazoratga olindi.
Mazkur murojaatlar xususiyatiga ko‘ra, turar joy bilan ta'minlash, uy-joy, moddiy yordam, sog‘liqni saqlash, mulkka nisbatan egalik huquqini e'tirof etish, aholi bandligi, doimiy ro‘yxatga qo‘yish, obodonlashtirish va boshqa masalalari bilan bog‘liq holatlarni tashkil etadi.
Shuningdek, kunning ikkinchi yarmida 45 nafar tarbiyasi og‘ir voyaga yetmagan shaxslar va ularning ota-onalari bilan uchrashuv o‘tkazilib, ular tomonidan turli masalalarda murojaatlar kelib tushdi.
Har bir bolaning qobiliyati va iste'dodini o‘z vaqtida payqash, tarbiyalash, ro‘yobga chiqarish nafaqat ota-ona, balki butun jamiyatning burchidir. Shu maqsadda, muloqotlar davomida fuqarolarning xohish va istaklarini inobatga olgan holda, individual tartibda psixolog ishtirokida tarbiyasi og‘ir voyaga yetmagan shaxslar bilan birgalikda uchrashuvlar ham tashkil etildi.
Mazkur uchrashuvlar davomida tarbiyasi og‘ir voyaga yetmagan shaxslar masalasida 11ta murojaat kirim qilindi.
Ta'kidlab o‘tish o‘rinliki, keskin va tahlikali sharoitda biz ota-onalar, ustoz-murabbiylar, jamoatchilik, mahalla-ko‘y yoshlar tarbiyasi masalasida hushyorlik va ogohlikni yanada oshirish talab etiladi.
Sayyor qabul va uchrashuv davomida kelib tushgan murojaatlar Toshkent shahar adliya boshqarmasi tomonidan qat'iy nazoratga olindi.
Odamlarning dardini eshitish, ular bilan ochiq muloqotda bo‘lish, og‘irini yengil qilish aholining davlat va jamiyatga ishonchini mustahkamlashga xizmat qiladi.
Navbatdagi sayyor qabul (soat 9-00 dan 13-00 gacha) va uchrashuv (soat 12-00 dan 14-00 gacha) joriy yilning 18 aprelida
Sergeli tumanidagi «O‘zgarish» mahalla fuqarolar yig‘inida o‘tkaziladi.
