AQSh «Tolibon» bo‘yicha bayonot berdi 

AQSh davlat kotibi vazifasini bajaruvchi Jon Sallivanning ma'lum qilishicha, Amerika hukumati «Tolibon» radikal harakatining bahorgi hujum haqidagi rejalaridan xabardor va ular toliblarni Afg‘oniston hukumati bilan hamkorlikni boshlashga chaqiradi. Bu haqda Davlat departamenti saytida e'lon qilingan bayonotda aytiladi.

«Qo‘shma Shtatlar «Tolibon»ning bayonotidan so‘ng Afg‘oniston xalqi tomonidan turibdi. Biz Afg‘oniston qurolli kuchlari jasoratini qo‘llab-quvvatlaymiz, ular afg‘on jamiyatini buzib tashlashga harakat qilayotgan «Tolibon» va terrorchilik guruhlariga qarshi kurashmoqda. Biz tinch hayot kechirayotgan, o‘z oilasini tarbiyalayotgan, universitetlarga borayotgan, korxonalar tashkil etayotgan, saylovlarga tayyorgarlik ko‘rayotgan Afg‘oniston fuqarolarini qo‘llab-quvvatlaymiz», - deyiladi Davlat departamenti bayonotida.

Shuningdek, Davlat departamenti AQSh prezidenti Donald Trampning toliblar «o‘q va bombalarni saylov byulletenlariga» almashtirishi kerakligi haqidagi so‘zlaridan iqtibos keltirgan.

Eslatib o‘tamiz, avvalroq «Tolibon» Afg‘onistonda bahorgi hujum boshlangani haqida ma'lum qilgandi.