«O‘zbekiston havo yo‘llari» MAK rivojlanish strategiyasiga muvofiq, aviaparkini zamonaviy flotga ega aviatashuvchi maqomini ta'minlab beruvchi havo kemalari bilan yangilash dasturini amalga oshirmoqda.
MAK axborot xizmati xabariga ko‘ra, joriy yilning 1 mayidan boshlab samolyot parkini unifikatsiyalash, parvozlar samaradorligi va rentabelligini oshirish maqsadida aviakompaniya Il-114-100 rusumidagi samolyotlar ekspluatatsiyasini to‘xtatdi.
Milliy aviakompaniyaning Il-114-100 samolyotlarini ekspluatatsiyadan chiqarish tadbirlari rejasiga muvofiq, aviaparkda mavjud bo‘lgan 6ta samolyot sotuvga qo‘yiladi. Il-114-100 samolyoti uchuvchilari MAK tomonidan ekspluatatsiya qilinayotgan Boeing va A320 samolyotlariga bosqichma-bosqich qayta o‘qitilmoqda.
Ta'kidlanishicha, Il-114-100 havo kemalaridan mahalliy yo‘nalishlarda foydalanilgan.
Eslatib o‘tamiz, «O‘zbekiston havo yo‘llari» Il-114−100 samolyotlaridan voz kechishni rejalashtirayotgani xabar qilingandi.
