Grozniydagi terakt qurbonlari orasida O‘zbekiston fuqarosi ham bo‘lgani aniqlandi

Grozniydagi cherkovga hujum vaqtida halok bo‘lgan kishining shaxsi aniqlandi, dedi jurnalistlarga Maxachkala va Grozniy Varlaam arxiyepiskopi. 

"Bu O‘zbekistondan kelgan Artemiy, u shu yerda yashardi, qarindoshlarini izlayotgandi. Bu yerda uning yaqinlari yo‘q, shu bois uning dafn marosimi bilan biz shug‘ullanamiz", - deya arxiyepiskopning so‘zlarini keltiradi RIA "Novosti".

Uning so‘zlariga ko‘ra, yeparxiya shuningdek shifoxonadagi jabrlanganlarga moliyaviy va tibbiy vositalar bilan yordam ko‘rsatadi. 

Bundan tashqari, arxiyepiskop patriarx Kirill bilan suhbatlashgani va u barcha pravoslavlarni tinchlik saqlashga chaqirganini ma'lum qildi. 

Kuni kecha 4 nafar jangari Grozniy markazidagi Arxangel Mixail cherkoviga bostirib kirgan. Cherkovni qo‘riqlayotgan 2 politsiyachi va yana bir kishi hujum qurboniga aylangan. Shuningdek 2 nafar huquq-tartibot organi xodimi ham jabrlangan. 

Maxsus operatsiya natijasida hujum bartaraf qilingan, ularning shaxsi aniqlangan. Respublika rahbari Ramzon Qodirovning aytishicha, hujumni amalga oshirganlarning 2 nafari Grozniy yaqinidagi Geldagan qishlog‘ida yashagan, guruh rahbari "qo‘shni mintaqalardan birining fuqarosi bo‘lgan". Uning so‘zlariga ko‘ra, "jangarilar G‘arb mamlakatlaridan biri tomonidan berilgan buyruq asosida harakat qilishganiga doir ma'lumot bor".