O‘zbekistonga McDonald's, Burger King va Starbucks brendlari kirib kelishi mumkin

Amerikaning McDonald's, Burger King va Starbucks kabi brendlari 2019 yilning yanvarigacha O‘zbekistonda o‘z tarmoqlarini ochishi mumkin. Bu haqda Vazirlar Mahkamasining «Chorvoq» erkin turistik zonasini (ETZ) tashkil etish chora-tadbirlari to‘g‘risida»gi qarorida ko‘zda tutilgan.

Hujjatga ko‘ra, 2019 yilning yanvariga qadar «Chorvoq» erkin turistik zonasi hududida jahon talab va standartlariga javob beradigan, ovqatlanish sohasidagi McDonald’s, Starbucks, Burger King va KFC kabi xalqaro brendlar tarmoqlarini yaratish masalalari ko‘rib chiqilishi kerak.

Bu qaror ijrosi uchun ETZ direksiyasi, Davlat turizm qo‘mitasi va Toshkent viloyati hokimiyati mas'ul etib tayinlandi.

Bundan avvalroq Toshkentda KFC’ning ilk restorani ochilishi haqida xabar berilgandi.