Toshkentda turkiyalik investorlar ishtirokida 6ta mehmonxona quriladi

Joriy yilning 29 aprel kuni Turkiya prezidenti Rajab Toyyib Erdo‘g‘anning O‘zbekistonga amalga oshirgan tashrifi davomida o‘tkazilgan biznes-forumda Toshkent shahar hokimligi turkiyalik ishbilarmonlar bilan umumiy qiymati 455,2 mln dollarga teng bo‘lgan 14 loyihani amalga oshirish bo‘yicha kelishuvga erishdi.

Toshkent shahar hokimligi axborot xizmati xabariga ko‘ra, mazkur kelishuvlarni ijrosini ta'minlash maqsadida Toshkent shahar hokimining tegishli qarori bilan “yo‘l xaritasi” tasdiqlandi. 

Unga muvofiq poytaxtda 6ta yangi zamonaviy mehmonxona barpo etiladi. Shuningdek, tasdiqlangan “yo‘l xaritasi”ga ko‘ra aholini va poytaxt mehmonlarini bo‘sh vaqtlarini unumli o‘tkazishlari uchun savdo va ko‘ngil ochar maskanlari barpo etilish rejalashtirilgan. 

Shartnomalarda to‘qimachilik va sanoatning boshqa turlari bo‘yicha bir qator loyihalar ham amalga oshirilishi ko‘zlangan.