Yunusobod tumani poytaxtning deyarli 300 ming aholisiga ega bo‘lgan sanoatlashgan qismi hisoblanadi. Tuman dastlab 1936 yil 26 avgustida Kirov nomi bilan tashkil etilgan. 1992 yil 8 mayida Yunusobod nomini olgan. Hududda 5300dan ortiq korxona va tashkilot faoliyat yuritadi.
2017 yilning aprel oyida Yunusobod tumaniga Baxtiyor Hasanovich Abdusamatov hokim etib tayinlandi. «Hokim bilan bir kun» loyihasi doirasida Yunusobod tumani hokimining bir kuniga hamrohlik qildik.
Kunni endigina qurib bitkazilgan «Xasanboy» mahalla fuqarolar yig‘ini markazi binosini mahalla oqsoqol va faollariga topshirish marosimi bilan boshladik. Aytish kerakki, mahalla markazi zamonaviy talablarga javob beradigan talabda qurilgan.
Bundan tashqari, qurilishi boshlangan «Katta Xasanboy», «Hamkorobod» va «Yangi bog‘» MFY markazlarini ko‘zdan kechirdik. Hokim mazkur markazlarning qurilishi bo‘yicha o‘z tavsiyalarini berdi. Kamchiliklarni bartaraf etish uchun mas'ul shaxslarga muddat tayinlandi, bolalar o‘yingohi maydoni kengaytirilishi lozimligi aytildi, binolarni sifatli qilib qurib bitkazish masalasi muhimligi ta'kidlandi.
Shu bilan birga «Obod mahalla» loyihasiga tushgan «Bog‘i shamol» MFY ko‘zdan kechirildi. U yerda tegishli o‘rinbosar va tashkilot rahbarlariga vazifalar berildi. Kasallangan daraxtlarni kesish, mahalla ichidagi yo‘laklarni ta'mirlash, ariqlarni ochib, suv oqadigan darajaga keltirish, fuqarolar uchun avtoturargoh qurish, bolalar o‘yingohini zamonaviy jihozlar bilan bezash, hududda noqonuniy qurilgan binolarni buzish, o‘zboshimchalik bilan o‘tkazilgan kabellarni tartibga solish, hududda tozalik ishlarini doimiy tarzda olib borish, yaroqsiz binolarni ta'mirlash va boshqalar bu loyihaga kiritilgani aytilib, barcha fuqarolar ogohlantirilishi zarurligi ta'kidlandi.
Tuman hududida joylashgan 240- va 246-maktablarga tashrif buyurdik. Ta'mirlash ishlari boshlangan maktab direktorlari bilan uchrashdik. Ular o‘z takliflarini aytishdi. Takliflar tuman hokimi yordamchisi tomonidan yozib olindi. Ular tegishliligi bo‘yicha ko‘rib chiqilishi tushuntirildi.
Shu kuni Markaz-5 hududida bolalar maydonchasi qurishni rejalashtirayotgan tadbirkor bilan tuman hokimi sayyor uchrashuv o‘tkazdi. Hokim albatta tegishli imkoniyatlar hokimiyat tomonidan yaratilishini ma'lum qildi.
