Toshkent 10 yildan so‘ng qanday ko‘rinishda bo‘ladi? 

Xalqaro press-klubda Toshkent shahri hokimi vazifasini bajaruvchi Jahongir Ortiqxo‘jayev ishtirokida «Toshkent: aqlli, obod va sevimli shahar uchun umumiy harakatlar rejasi» mavzusida navbatdagi sessiya bo‘lib o‘tdi. Bu haqda Kun.uz muxbiri xabar bermoqda.

«Reja bo‘yicha 10 yildan keyin Toshkent shahri aholining yashashiga qulay bo‘lishi kerak. Yashaydigan joy, uylar yaxshilanishi lozim, jamoat transportini ko‘paytirish zarur. Shuningdek, bog‘cha, maktab, poliklinikalar sonini oshirish darkor. Bular hozircha bizda norma bo‘yicha yetmaydi. Bundan tashqari, shaharning hududini ham ozgina kengaytirish kerak. Bu boradagi reja 2030 yilgacha ishlab chiqilgan. Har bir tuman bo‘yicha yaxshilab ishlansa, shaharning ko‘rki ham o‘zgaradi. Hozirda har bir tuman bilan ishlar olib borilmoqda. 

Hozirgi kunda qo‘yilayotgan maqsadlar, rejalarni tushunayotgan arxitektorlar bor, biz ular bilan ishlamoqdamiz. Bundan tashqari, tegishli oliy o‘quv yurtlaridan yosh, iste'dodli arxitektorlarni olib, tumanlarga biriktirmoqdamiz. Har bir tumanda yaxshi biznes-loyihalar ishlab chiqilmoqda. Chet eldan ham nomdor mutaxassislar chaqirilgan, hozirda ular shahar arxitekturasi, yo‘llar bo‘yicha ishlamoqda. Shahar 10 yildan keyin qanday ko‘rinishi, buziladigan uylar o‘rnida nimalar paydo bo‘lishi ustida ishlanmoqda. 25 iyun kuniga qadar poytaxtdagi to‘rtta ko‘chaning loyihasi taqdim etiladi. Agarda xalqimiz unga rozilik bildirsa, hamma ishlarni boshlab yuboramiz», - deya aytildi tadbirda. 

Eslatib o‘tamiz, avvalroq Toshkent hokimi poytaxtdagi muammolarni sanagandi.