Markaziy Osiyoda eng katta aholiga ega bo‘lgan Toshkent shahar byudjyeti 2,4 trillion so‘m qiymatida qayd etilgan. Shaharda 39ta oliy o‘quv yurtlari va 62ta ilmiy fan institutlari faoliyat ko‘rsatib, unda 115 mingdan ziyod talaba tahsil oladi.
Kelgusida shahar yana 335 kv. km o‘sishi rejalashtirilgan. Shunga qaramay unda bir qancha muammolar mavjud. Bu haqda Toshkent shahar hokimi vazifasini bajaruvchi Jahongir Ortiqxo‘jayev «Top-500 biznes konferensiyasi»da ma'lum qildi.
«Asosiy muammo - shaharda tasdiqlangan bosh rejaning yo‘qligi va uning ochiq emasligi. Buzilish va ko‘chirish ishlari palapartish olib boriladi. Investorlarga reja qilish imkoniyati berilmagan. Mulkdorlarning o‘z mulkini himoya qilishini qiyinlashtiradi. Shahar hokimiyati imidji va ishlari nisbiy tus olmoqda», deydi u.
Jahongir Ortiqxo‘jayevning aytishicha, shaharning o‘rta va uzoq muddatli strategiyasining yo‘qligi yana boshqa muammolardan biri hisoblanadi.
«Iqtisodiy va ijtimoiy ko‘rsatkichlar har yili tasdiqlanib chiqiladi. Bu uzoq muddatli rejalarni qurishga imkoniyat bermaydi. Shahrimiz rivojida disbalans bor. Tumanlarning rivojida katta disbalans. Aksariyat sifatli xizmatlarni iste'mol qilish uchun shahar markaziga kelish lozim.
Biz shahrimizning har bir tumani va hududi rivojlanishini istaymiz. Yuqori sifatli ish o‘rinlari, hordiq chiqarish va ishlash Toshkentning har qismida bo‘lishiga harakat qilamiz», deb fikr bildirgan u.
Yopiqlik va shaffoflikning yetishmasligi ham muammolardan biri sifatida qayd etildi.
«Yer taqsimlanishi, davlat tenderlari va buyurtmalari mexanizmlarining oydin emasligi, shuningdek shaharni boshqarishda samaradorlikning pastligi. Muloqotlar yetishmaydi. Rejalar esa doimiy o‘zgaradi. Ko‘rsatilayotgan davlat xizmatlarining sifati past. Xalqaro tajribalarning yetarlicha o‘rganilmayotgani, zamonaviy texnologiyalar sust qo‘llanilmoqda», deb kamchiliklarni sanab o‘tdi Jahongir Ortiqxo‘jayev.
