Andijonda ona ikki farzandini beliga bog‘lab, o‘zini daryoga otdi

25 iyun kuni Andijonda ayol o‘zini va 2 nafar farzandini soyga tashladi. Bu haqda O‘zbekiston Respublikasi IIV Jamoatchilik va ommaviy axborot vositalari bilan aloqalar boshqarmasi xabar bergan.

«2018 yil 25 iyun kuni soat 10-30 larda 27 yashar ayol A. beliga arqon bilan 2 nafar farzandini (7 yashar qiz va 3 yashar o‘g‘il) bog‘lab, o‘zini Andijon viloyati, Jalaquduq tumani hududidan oqib o‘tgan «Shaxrixonsoy» kanaliga tashlagan, ularni fuqaro B. va boshqalar suvdan chiqarib olgan. A. ning hayoti saqlab qolingan, lekin voyaga yetmagan farzandlari M. va Sh. lar voqea joyida vafot etgan», deyilgan xabarda.

Mazkur holat yuzasidan Jalaquduq tuman prokuraturasi tomonidan ayolga nisbatan O‘zbekiston Respublikasi Jinoyat kodeksining 97-moddasi 2-qismi «v» bandi bilan jinoyat ishi qo‘zg‘atilib, tergov harakatlari olib borilmoqda.