Apple kompaniyasi sobiq xodimini haydovchisiz avtomobil loyihasi haqidagi maxfiy ma'lumotlarni o‘g‘irlashda aybladi. Bu haqda Bloomberg axborot agentligi ma'lum qildi.
Ma'lum qilinishicha, xitoylik muhandis Syaolan Chjan 7 iyulda San-Xose xalqaro aeroportida Xitoyga uchib ketish vaqtida ushlangan. U Guanchjoudagi Xiaopeng Motors kompaniyasida ishlamoqchiligini aytib, Apple’dan 2018 yil aprelda bo‘shab ketgan. Kompaniya xodimini tarmoqdagi faolligi oshgani va ishdan bo‘shagandan keyin ofisga tez-tez kelib turishi sababli ma'lumotlarni o‘g‘irlashda gumon qila boshlagan.
Chjan FQB tomonidan so‘roq qilinganda haydovchisiz avtomobil loyihasi ma'lumotlarini rafiqasi noutbukiga ko‘chirib olganini tan olgan. Xiaopeng Motors vakili Chjan Apple’ning maxfiy ma'lumotlarini bermagani va uning ishi AQShda tergov qilinayotgani ma'lum bo‘lishi bilanoq bo‘shatib yuborilganini ma'lum qilgan.
The Washington Post nashri ma'lumotlariga ko‘ra, erkak aybdor deb topilsa, 10 yillik qamoq jazosi olishi va 250 ming dollarlik jarimaga tortilishi mumkin.
