O‘zbekistonlik talaba Janubiy Koreyada immigratsiya xizmati tomonidan kaltaklandi. Talabalar elchixonadan norozi, deputat TIVdan izoh talab qildi

16 iyul kuni Janubiy Koreyadagi oliygohlarning birida magistraturada tahsil olayotgan 24 yoshli o‘zbekistonlik talaba Immigratsiya xizmati xodimlari tomonidan kaltaklangan. Voqea shu hududdagi videokuzatuv kamerasiga muhrlangan. 

Video 31 iyul kuni Koreyadagi muhojirlarning huquqlarini himoya qiluvchi agentlik tomonidan e'lon qilingach, voqea koreys jamoatchiligining keskin noroziliklarini keltirib chiqardi.

«Azon.uz» nashrining yozishicha, A. ismli o‘zbekistonlik talaba yozgi ta'tildan unumli foydalanib, Kyongsang viloyatining Haman shaharchasidagi zavodga ishlash uchun borgandi. U daraxt soyasida dam olib o‘tirganida notanish erkaklar kelib, uni kaltaklashadi. Ma'lum bo‘lishicha, talabani kaltaklaganlar Changvon Immigratsiya xizmati xodimlari bo‘lib, ular o‘sha kuni noqonuniy maqomda yurgan muhojirlarga qarshi reyd o‘tkazayotgan bo‘lgan.

YTN xabariga ko‘ra esa, talaba politsiyachilar hujjat ko‘rsatishni talab qilganida, ularga quloq solmagan va qarshilik ko‘rsatgan. Uning qo‘lidagi qurilish qurolini politsiyachilar tahdid o‘laroq qabul qilishgan.

MBC kanalining xabar berishicha, immigratsiya xizmati binosiga olib kelingan o‘zbekistonlik talaba 5 kun davomida tibbiy yordamsiz ushlab turilgan. U ta'lim oladigan Seul universiteti Changvon Immigratsiya xizmati nomiga o‘zbekistonlik talabaning ishini qayta ko‘rib chiqishni so‘rab murojaat yo‘llagan. Shundan so‘ng tegishli ruxsatnomasiz ishlagani uchun o‘zbekistonlik talabaga 500 ming von (taxminan 3,5 million so‘m) jarima solingan va u qo‘yib yuborilgan.

Mahalliy immigratsiya xizmati rasmiysi bu holat yuzasidan shunday degan: «Reyd davomida ortiqcha jismoniy zo‘ravonlik qo‘llangani tasdiqlandi, biz bo‘lib o‘tgan voqeadan afsusdamiz», deya ta'kidlagan.

O‘zbekistonlik talaba hozirda Changvon Immigratsiya xizmati ustidan da'vo arizasi kiritishga tayyorgarlik ko‘ryapti. Ijtimoiy tarmoqlarda voqeaga munosabat bildirgan Janubiy Koreya fuqarolari ham Immigratsiya xizmati xodimlari albatta jazoga tortilishi kerak degan talab bilan chiqqan.

«Hatto u xorijlik bo‘lib, noqonuniy ishlaganida ham, huquq tartibot organlari unga nisbatan kuch ishlatishga haqli emas. Agressiv harakat – bu inson huquqlariga zarbadir. Biz bu holat yuzasidan jiddiy tekshiruv o‘tkazilishini so‘raymiz», deyilgan petitsiyada.

Ayni vaqtda, Janubiy Koreyadagi o‘zbekistonlik talabalar Facebook orqali O‘zbekistonning Seuldagi elchixonasi nomiga murojaat yo‘llagan: unda elchixona o‘zbekistonlik talabalar bilan qoniqarsiz ishlayotgani ko‘rsatib o‘tilgan.

Xalq deputatlari Uchtepa tuman kengashi deputati, O‘zLiDep deputatlik guruhi rahbari o‘rinbosari Nuriddin Zaynitdinov Koreyada kaltaklangan o‘zbek talabasi ishi bo‘yicha O‘zbekiston Tashqi ishlar vazirligidan izoh talab qilgan: «Janubiy Koreya Respublikasida qonuniy asosda yashayotgan O‘zbekistonlik 24 yoshli talaba yigitni 16-iyulda Kyongsang viloyatidagi Haman shaharchasida Immigratsiya xizmati xodimlari tomonidan asossiz ravishda, qattiq kaltaklaganini qattiq qoralayman.

Yurtdoshimizning aybi kontrakt to‘lash uchun ishlayotganimidi?!

Bu holat bo‘yicha Tashqi ishlar vazirligining mutassadi vakillari nega munosabat bildirmadi? Bizning elchixona vakillari tezkor harakat qilmadi? Axir bu talaba yigit O‘zbekiston fuqarosi-ku? Uning haq-huquqlarini himoya qilinishi va buzilgan huquqlari tiklanishi kerak».