O‘zbekiston Respublikasi Prezidentining 2018 yil 2 avgustdagi Farmoniga asosan Dilshod Faxriyevich Rahimov O‘zbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamenti boshlig‘i vazifasini bajaruvchi lavozimiga tayinlandi.
Dilshod Rahimov 1978 yilda tug‘ilgan, ma'lumoti oliy, huquqshunos. 2002 yilda Toshkent davlat yuridik institutini tamomlagan.
U prokuratura organlaridagi ish faoliyatini 2010 yilda O‘zbekiston Respublikasi Bosh prokuraturasi huzuridagi Departamentda boshlab, Departament organlarida turli lavozimlarda, 2012 yildan Bosh prokuratura bo‘lim prokurori, katta prokurori, boshqarma katta prokurori, boshqarma boshlig‘i o‘rinbosari, boshqarma boshlig‘i lavozimlarida faoliyat yuritgan.
Avval O‘zbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamenti boshlig‘ining birinchi o‘rinbosari lavozimida ishlagan. U endilikda Bosh prokuror o‘rinbosariga aylangan Akmalxo‘ja Mavlonov o‘rnida ish boshlaydi.
O‘z navbatida, Rahimovga birinchi o‘rinbosar tayinlangan.
O‘zbekiston Respublikasi Bosh prokurorining 2018 yil 2 avgustdagi buyrug‘iga asosan Umidjon Salimovich Muhamedov O‘zbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamenti boshlig‘ining birinchi o‘rinbosari lavozimiga tayinlandi.
Umidjon Muhamedov 1976 yilda tug‘ilgan, ma'lumoti oliy, huquqshunos. 1998 yilda Toshkent davlat yuridik institutini tamomlagan.
Prokuratura organlaridagi ish faoliyatini 1998 yilda Toshkent harbiy prokuraturasida boshlab, O‘zbekiston Respublikasi Harbiy prokuraturasi organlarida turli lavozimlarda, 2010 yildan Bosh prokuratura bo‘lim katta prokurori, bo‘lim boshlig‘i o‘rinbosari, boshqarma boshlig‘i o‘rinbosari, boshqarma boshlig‘i, Ohangaron tuman prokurori lavozimlarida faoliyat yuritgan.
U bungacha O‘zbekiston Respublikasi Bosh prokuraturasi qonuniylik va huquq-tartibotni ta'minlash muammolarini tahlil qilish boshqarmasi boshlig‘i lavozimida ishlagan.
Shuningdek, O‘zbekiston Respublikasi Bosh prokurorining 2018 yil 2 avgustdagi buyrug‘iga asosan Jamol Alisherovich Achilov Umidjon Muhamedov o‘rniga O‘zbekiston Respublikasi Bosh prokuraturasi qonuniylik va huquq-tartibotni ta'minlash muammolarini tahlil qilish boshqarmasi boshlig‘i lavozimiga tayinlandi.
Achilov 1982 yilda tug‘ilgan, ma'lumoti oliy, huquqshunos. 2002 yilda Toshkent davlat yuridik institutini tamomlagan.
U ish faoliyatini 2008 yilda O‘zbekiston Respublikasi Adliya vazirligi iqtisodiy qonunchilik boshqarmasida boshlab, Adliya vazirligida turli lavozimlarda, 2015 yildan O‘zbekiston Respublikasi Vazirlar Mahkamasi, O‘zbekiston Respublikasi Prezidenti devonida mas'ul lavozimlarda faoliyat yuritgan.
Avval O‘zbekiston Respublikasi Bosh prokuraturasi bojxona va soliq sohalarida qonunchilik ijrosi ustidan nazorat boshqarmasi boshlig‘i lavozimida ishlagan.
