«Roma» klubi Tvitterda «Barselona» hujumchisi Lionel Messini o‘z futbolkasida tasvirladi.
«Roma» prezidenti Jyeyms Pallotta «Barselona» klubining sobiq tijorat direktori Franchesko Kalvo bilan shartnoma imzolanganini izohlab, Malkomning barbod bo‘lgan transferi uchun kataloniyaliklardan hali ham xafa ekanini ma'lum qildi.
«Kalvo bilan shartnoma imzoladik, ammo bu hech narsani o‘zgartirmaydi. Bizga hamon Messi kerak», — dedi Pallotta.
Eslatib o‘tamiz, «Bordo» klubining braziliyalik futbolchisi Malkom rimliklar safiga o‘tishga yaqin edi. Ammo «Barselona» so‘nggi pallada oraga tushib, Malkom uchun ko‘proq pul taklif qildi va yakunda u bilan shartnoma imzoladi. Shundan so‘ng, Palotta hujumchi Lionel Messini berishsa, bu ishi uchun «Barselona»ni kechirishi mumkinligini aytgan edi.
