O‘zbekistonda “Yosh akademiklar” klubi paydo bo‘ladi va “Akademik shogirdi” faxriy nishoni ta'sis etiladi

Normativ-huquqiy hujjatlar loyihalari muhokamasi portalida Vazirlar Mahkamasining “Yosh akademiklar” klubi va “Akademik shogirdi” faxriy nishoni nizomlarini tasdiqlash haqida”gi qarori loyihasi joylashtirildi.

Hujjat bilan O‘zbekiston Respublikasi Vazirlar Mahkamasining 2018 yil 19 iyuldagi 559-son qarori ijrosini ta'minlash uchun O‘zbekiston Respublikasi Fanlar akademiyasi, Innovatsion rivojlanish vazirligi, Xalq ta'limi vazirligi, Oliy va o‘rta maxsus ta'lim vazirligi, Axborot texnologiyalari va kommunikatsiyalarni rivojlantirish vazirligi, O‘zbekiston Yoshlar ittifoqi, Davlat test markazi ishtirokida yoshlarni ilm-fan sohasiga keng jalb qilishga yo‘naltirilgan yaxlit tizimni shakllantirish maqsadida Fanlar akademiyasi tarkibida “Yosh akademiklar” klubi tashkil etilishi mumkin.

“Akademik shogirdi” faxriy nishoni O‘zbekiston Respublikasi Fanlar akademiyasi Prezidiumi tomonidan umumiy o‘rta maktab, akademik litsey va kasb-hunar kollejlar o‘quvchilari hamda Oliy ta'lim muassasalarining iqtidorli talabalaridan tashkil topgan “Yosh akademiklar” klubi a'zolari orasidan o‘quv seminarlari davrida mehnatsevarligi, ilm sohasidagi faolligi, erishgan yutuqlari, iqtidori, ilmiy salohiyati bilan alohida ajralib turgan, ilmiy-tadqiqot olib borishga ishtiyoqi baland yoshlarni munosib taqdirlash maqsadida topshiriladi.

Mazkur qarorning bajarilishida:

- O‘zbekiston Respublikasi Fanlar akademiyasi (B.Yuldashev) – «Yosh akademiklar» klubi faoliyatini tashkil etsin, bunda Respublikada akademiklar va boshqa yetakchi olimlarning rahbarligida iqtidorli yoshlarni ilmiy bilimlarni chuqur o‘rganish va ilmiy tadqiqotlar bilan shug‘ullanishga ko‘maklashish va maqsadli jalb etish choralarini ko‘radi;

- Xalq ta'limi vazirligi (Sh.Shermatov), Oliy va o‘rta maxsus ta'lim vazirligi (I.Madjidov) – umumiy o‘rta maktab va akademik litseylaridagi iqtidorli o‘quvchilarni saralash, ularni ilmiy faoliyatga maqsadli jalb etish uchun har bir tuman (shahar)da tashkil etilgan tayanch maktablarda tegishli fan yo‘nalishlari bo‘yicha shakllantirilgan akademik guruhlarida Fanlar akademiyasining akademiklari, oliy ta'lim muassasalarini professor-o‘qituvchilari hamda oliy toifali o‘qituvchilarni jalb etgan holda muntazam maqsadli mashg‘ulotlar tashkil etish choralarini ko‘radi;

- Oliy va o‘rta maxsus ta'lim vazirligi (I.Madjidov) – kasb-hunar kollejlari va Oliy ta'lim muassasalaridagi iqtidorli o‘quvchi va talabalarni saralash, ularni ilmiy faoliyatga maqsadli jalb etish uchun har bir viloyatning tegishli oliy ta'lim muassasalarida tegishli fan yo‘nalishlari bo‘yicha shakllantirilgan akademik guruhlarida Fanlar akademiyasining akademiklari, oliy ta'lim muassasalarining professor-o‘qituvchilarini jalb etgan holda muntazam maqsadli mashg‘ulotlar tashkil etish choralarini ko‘radi;

- O‘zbekiston Respublikasi Innovatsion rivojlanish vazirligi (I.Abduraxmonov) –Innovatsion g‘oyalar va ishlanmalar bo‘yicha yilning salohiyatli yoshlarini aniqlash maqsadida InnoWeek.uz haftaligi doirasida tanlovlar o‘tkazadi hamda g‘oliblarni aniqlash va taqdirlash bo‘yicha tegishli choralarni ko‘radi;

- O‘zbekiston Yoshlar ittifoqi (Q.Quranbayev) – “Yosh akademiklar” klubi forumini va boshqa tadbirlarini tashkillashtirish hamda faol iqtidorli yoshlarni taqdirlash bo‘yicha tegishli choralarni ko‘radi;

- O‘zbekiston Respublikasi Vazirlar mahkamasi huzuridagi Davlat test markazi (M.Karimov) - umumiy o‘rta maktab, akademik litsey va kasb-hunar kollejlari o‘quvchilari hamda oliy ta'lim muassasalari talabalari orasidan qobiliyatli va iqtidorli yoshlarni saralashda maxsus sinovlar tashkil etish choralarini ko‘radi;

O‘zbekiston Respublikasi Fanlar akademiyasi tarkibidagi «Yosh akademiklar» klubi nizomiga ko‘ra, «Yosh akademiklar» klubi a'zolarining asosiy maqsad va vazifalari quyidagilar:

«Yosh akademiklar» klubining a'zolari (keyingi o‘rinda Yosh akademiklar) chuqur bilimlarga ega bo‘lish va ilmiy-tadqiqot faoliyatida tajriba orttirish;
Yosh akademiklar o‘quv seminarlari va zamonaviy axborot texnologiyalari bilan yangi bilimlarni muvaffaqiyatli o‘zlashtirishlari va o‘z ustida muntazam ishlash orqali bilim darajasini oshirish;
Akademiklar va boshqa yetakchi olimlar ishtirokida fan yo‘nalishlari bo‘yicha forumda va boshqa tadbirlarda faol ishtirok etish;
"Akademik shogirdi" ko‘krak nishoni mukofotiga sazovor bo‘lish uchun munosib o‘quv va ilmiy faoliyatini olib borish;
Tanlangan fan sohasi bo‘yicha kelajakda ilmiy ishlarni olib borish uchun tayyorlanish;
«Yosh akademiklar» klubining faoliyatlarini umumta'lim maktablari va akademik litsey hamda kasb-hunar kollejlari o‘quvchilari, shuningdek Oliy ta'lim muassasalari talabalari orasida targ‘ib qilish;
“Yosh akademiklar” klubi faoliyatida bo‘lib o‘tadigan tadbirlarda faol ishtirok etish.

"Akademik shogirdi" faxriy nishoniga talabgorlar “Yosh akademiklar” tomonidan mehnatsevarligi, ilm sohasidagi faolligi, erishgan yutuqlari, iqtidori, ilmiy salohiyati bilan alohida ajralib turgan, ilmiy-tadqiqot olib borishga ishtiyoqi baland yoshlarni o‘quv seminarlari davrida erishgan natijalari asosida saralab olinadi.

Forumlarda akademiklar «Yosh akademiklar» klubi a'zolari orasidan yuqori reytingga ega bo‘lgan potensial nomzodlarni oldindan tanlab olib, ularni «Yosh akademiklar» klubi Prezidiumiga taqdim etadi.

«Yosh akademiklar» klubi Prezidiumi akademiklar tavsiya etgan nomzodlarni ularning individual ilmiy faoliyati natijalariga asoslanib "Akademik shogirdi" faxriy nishoni bilan taqdirlaydi.

“Akademik shogirdi” faxriy nishoni haqidagi nizomga ko‘ra, "Akademik shogirdi" faxriy nishoni iqtidorli o‘quvchi va talabalar uchun muayyan ilmiy sohada o‘z ilmiy maktabini yaratgan akademiklar tomonidan beriladigan mukofotdir.

"Akademik shogirdi" faxriy nishoni O‘zbekiston Respublikasi Fanlar akademiyasi haqiqiy a'zosi (akademik) tomonidan o‘rta maktab, litsey va kollejlar o‘quvchilariga hamda Oliy ta'lim muassasalarining iqtidorli talabalaridan tashkil topgan “Yosh akademiklar” klubi a'zolari tomonidan o‘quv seminarlari davrida mehnatsevarligi, ilm sohasidagi faolligi, erishgan yutuqlari, iqtidori, ilmiy salohiyati bilan alohida ajralib turgan, ilmiy-tadqiqot olib borishga ishtiyoqi baland yoshlarni munosib taqdirlash maqsadida topshiriladi.

"Akademik shogirdi" faxriy nishoniga “Yosh akademiklar” klubi Prezidiumining qarori asosida tavsiya qilinadi.

"Akademik shogirdi" faxriy nishoni, "Akademik shogirdi" guvohnomalari hamda taqdirlash tartibi “Yosh akademiklar” klubi Prezidiumi tomonidan tasdiqlanadi.

"Akademik shogirdi" faxriy nishoni va guvohnomasi har yili 4 noyabrda - O‘zbekiston Respublikasi Fanlar akademiyasining tashkil topgan kuni “Yosh akademiklar” klubi Prezidiumi Prezidenti tomonidan tantanali ravishda topshiriladi.

"Akademik shogirdi" faxriy nishoni bilan bir marta taqdirlanadi.