Prezident administratsiyasi rahbariga o‘rinbosarlar tayinlandi

27 avgust kuni O‘zbekiston prezidenti Sh.Mirziyoyev rahbarligida yig‘ilish o‘tkazilgani, uning yakunlariga ko‘ra Prezident devoni Prezident administratsiyasi etib qayta tashkil etilgani, shu vaqtgacha prezident ijroiya apparati rahbari — maslahatchi sifatida faoliyat ko‘rsatib kelayotgan Zaynilobiddin Shahobiddinovich Nizomiddinov administratsiya rahbari etib tayinlangani haqida avvalroq xabar bergan edik.

Kun.uz’ga ma'lum qilinishicha, Prezident administratsiyasi rahbari Zaynilobiddin Nizomiddinovning o‘rinbosarlari ham tasdiqlangan. Bu vazifaga — Aziz Mag‘rupov, Alisher Payg‘amov va Komil Allamjanov tayinlangan.

Eslatib o‘tamiz, endi davlat maslahatchisi instituti tugatilgan, davlat maslahatchilari prezident maslahatchilariga aylangan. Prezidentning yoshlar siyosati masalalari bo‘yicha sobiq davlat maslahatchisi Qahramon Quronboyev hamda madaniyat, matbuot va ijodiy tashkilotlar masalalari bo‘yicha sobiq davlat maslahatchisi Xayriddin Sultonov boshqa ishga o‘tkazilgan.

Boshqa sobiq davlat maslahatchilari Rustam Qosimov, Rustam Inoyatov, Viktor Mahmudov hamda Tursinxon Xudeybergenov o‘z lavozimlariga qayta tayinlangan. Prezident devonining sobiq rahbari Zelimxon Haydarovning keyingi faoliyati haqida hozircha ma'lumot yo‘q.