Prezident administratsiyasida OAV bo‘yicha sho‘'baga rahbar tayinlandi

Jurnalist va shoir Salim Ashur O‘zbekiston Respublikasi Prezidenti administratsiyasining Ommaviy axborot vositalari, televideniye va matbuotni rivojlantirish sho‘'basi mudiri etib tayinlandi. Bu ma'lumotni «Kun.uz» manbasi tasdiqladi.

Ushbu sho‘'ba Ommaviy axborot vositalari, ma'naviyat va ma'rifat, madaniyat, san'at va ijodiy tashkilotlarni rivojlantirish masalalari xizmati tarkibidagi sektor hisoblanadi.

Bundan tashqari, Bahodir Maxsutovich Yunusov sho‘'baga bosh konsultant bo‘lgan, Elbek Ulug‘bekovich Dolimov esa sho‘'baning yetakchi konsultanti lavozimiga tayinlangan.

Ma'lumot uchun, Salimboy Ashurov oxirgi vaqtlarda prezident apparatida ishlagan, Bahodir Yunusov Bosh prokuratura multimedia markazida, Elbek Dolimov esa Axborot texnologiyalari va kommunikatsiyalarini rivojlantirish vazirligi matbuot kotibi lavozimida faoliyat ko‘rsatib kelayotgandi.

Eslatib o‘tamiz, 27 avgust kuni O‘zbekiston prezidenti devoni prezident adminstratsiyasi sifatida qayta tashkil etilgan va unga Zaynilobiddin Nizomiddinov rahbar etib tayinlangandi.

Ko‘p yillar davomida prezident devonida Ommaviy axborot vositalari, ma'naviyat va ma'rifat, madaniyat, san'at va ijodiy tashkilotlarni rivojlantirish masalalari bo‘yicha sobiq davlat maslahatchisi bo‘lib kelgan Xayriddin Sultonov davlat rahbari spichrayteri (nutqlarini yozib beruvchi — tahr.) lavozimiga o‘tkazilgandi.

OAV bo‘yicha xizmatni esa vaqtinchalik prezidentning Fan, ta'lim, sog‘liqni saqlash va sportni rivojlantirish masalalari bo‘yicha davlat maslahatchisi Abdujabbor Abduvohitov boshqarib turishi ma'lum qilingandi.

Sentabr oyi oxirida Farhod Mahmudov ushbu xizmat rahbariga o‘rinbosar etib tayinlandi.

Hozirda Ommaviy axborot vositalari, ma'naviyat va ma'rifat, madaniyat, san'at va ijodiy tashkilotlarni rivojlantirish masalalari xizmati rahbari lavozimi bo‘sh qolmoqda.