Normativ-huquqiy hujjatlar loyihalari muhokamasi portalida Vazirlar Mahkamasining “Xo‘jalik yurituvchi sub'yektlarda realizatsiya qilingan tovarlar (ishlar, xizmatlar) tushumi va xodimlar sonining xronometrajini o‘tkazish tartibi to‘g‘risida nizomni tasdiqlash haqida”gi qarori loyihasi joylashtirildi.
Hujjat bilan xo‘jalik yurituvchi sub'yektlarda realizatsiya qilingan tovarlar (ishlar, xizmatlar) tushumi va xodimlar sonining xronometrajini o‘tkazish tartibi to‘g‘risidagi Nizom tasdiqlanishi mumkin.
Nizomga ko‘ra, xronometraj soliq to‘lovchining mansabdor shaxslari yoki ularning vakillari ishtirokida, davlat byudjyeti daromadlarini oshirish zahiralarini aniqlash yo‘nalishida ma'lum bir davr uchun davlat soliq xizmati organlariga taqdim etilgan hisobotlarda sotilgan mahsulot, bajarilgan ish, ko‘rsatilgan xizmatlar realizatsiyasidan tushgan tushumlarni va xodimlarning hisobotdagi va haqiqiy sonining muvofiqligini tasdiqlash maqsadida o‘tkaziladi.
Xronometraj bevosita xo‘jalik yurituvchi sub'yektga mulk huquqi, egalik qilish huquqi, foydalanish huquqi yoki ijara huquqi asosida tegishli bo‘lgan, shuningdek pudrat va (yoki) boshqa huquqiy tusdagi shartnomalarga asosan tovarlar ishlab chiqariladigan va realizatsiya qilinadigan, ishlar, xizmatlar bajariladigan obektlarda realizatsiyadan tushadigan tushumlarning haqiqiy hajmi, shuningdek mavjud xodimlarning sonini birma-bir sanab chiqish orqali aniqlanadi.
Xronometrajni amalga oshirish jarayonida tekshirish o‘tkazishga, xo‘jalik yurituvchi sub'yektga nisbatan xronometraj o‘tkazish bilan bog‘liq bo‘lmagan holatlar bo‘yicha talablarni qo‘yishga yoki uning moliyaviy-xo‘jalik faoliyatiga boshqacha tarzda aralashishga yo‘l qo‘yilmaydi, bundan xronometraj o‘tkazilayotgan vaqtda nazorat-kassa mashinasi va to‘lov terminallaridan foydalanishga oid ma'lumotlarni hamda xronometraj o‘tkazilayotgan obektlarda mehnat shartnomasi tuzgan va (yoki) tuzmagan holda faoliyat yuritayotgan jismoniy shaxslar to‘g‘risidagi ma'lumotlarni olish mustasno.
Xronometraj natijalaridan taqdim etilayotgan soliq hisobotining haqqoniyligini tahlil qilib borish, soliq va boshqa majburiy to‘lovlarni qayta hisoblash, shuningdek soliq solish bilan bog‘liq obektlar to‘g‘risidagi ma'lumotlar bazasini yuritish va qo‘shimcha soliq solinadigan manbalarni aniqlashda foydalaniladi.
Xronometrajdan keyingi kunlardagi o‘rtacha tushumlar asosli sabablarga ko‘ra kamayib yoki ko‘payib ketgan holatlarda xo‘jalik yurituvchi sub'yekt o‘rtacha kunlik yoki oylik tushumlarni aniqlash uchun qayta xronometraj o‘tkazish to‘g‘risida davlat soliq xizmati organiga murojaat qilishi mumkin.
