Minsk va Toshkent o‘rtasida to‘g‘ridan-to‘g‘ri aviareyslar soni haftasiga to‘rttagacha oshirilishi mumkin. Bu haqda Belarusning O‘zbekistondagi elchisi Leonid Marinich bugun jurnalistlarga xabar berdi, deb yozmoqda BeLTA.
«Belarusning «Belavia» shirkati yaqin kelajakda Toshkentga yana ikkita qo‘shimcha reyslarni yo‘lga qo‘yish masalasini ko‘rib chiqmoqda. Bu qachon aniq yuz berishini bilmaymiz, biroq muzokaralar olib bormoqdamiz», - dedi Leonid Marinich.
Elchining aniqlik kiritishicha, reysni ochish muammo emas, asosiysi - uni to‘ldirish va bundan iqtisodiy samara olish.
Belarus hamda O‘zbekiston poytaxtlari o‘rtasida hozircha haftada ikki marotaba to‘g‘ridan-to‘g‘ri reyslar seshanba va payshanba kunlari amalga oshirilmoqda. Ular «O‘zbekiston havo yo‘llari» tomonidan yo‘lga qo‘yilgan.
