FIFA klublarning ijaraga berishi mumkin bo‘lgan o‘yinchilari soniga cheklov o‘rnatish imkoniyatini ko‘rib chiqmoqda. Bu haqda Bild xabar bergan.
FIFA mutasaddilari ushbu taklifni ma'qullasa, klublar eng ko‘pi bilan 8 futbolchini ijaraga berishlari mumkin bo‘ladi. Shuningdek, bir jamoa ikkinchisiga 4 nafardan ortiq o‘yinchisini ijaraga berishi ham taqiqlanishi mumkin. Bunda klublarning 21 yoshga to‘lmagan o‘z tarbiyalanuvchilari istisno sanaladi.
Manba ma'lumotiga ko‘ra, ushbu tartib joriy etilgan taqdirda u ayniqsa «Chelsi» va «Yuventus» klublariga daxldor bo‘ladi. Joriy mavsumda London klubining 40 nafar o‘yinchisi ijara huquqi asosida boshqa jamoalar sharafini himoya qilmoqda. Turinliklar esa 26 a'zosini ijaraga qo‘yib yuborgan.
