«Vostok-2018» mashqlariga borgan Putin Rossiyada tajovuzkor rejalar yo‘qligini aytdi

Rossiya prezidenti Vladimir Putinning ma'lum qilishicha, Rossiya tinchliksevar davlat va unda tajovuzkor rejalar yo‘qdir. Bu haqda u «Vostok-2018» harbiy mashg‘ulotlariga tashrif buyurgan paytda aytib o‘tdi, deb xabar bermoqda «Interfaks».

«Bizning tashqi siyosatimiz manfaatdor bo‘lgan barcha mamlakatlar bilan samarali hamkorlik qilishga qaratilgan», - deya aytib o‘tdi Rossiya yetakchisi.

Shu bilan birga, u harbiylarga murojaat qilib, vatan oldidagi burchlari «mamlakat suvereniteti, xavfsizligi va milliy manfaatlarini himoya qilishga tayyor turish»da ekanini qayd etib o‘tdi. «Kerak bo‘lsa - ittifoqchilarni ham qo‘llab-quvvatlash», - deya qo‘shimcha qilgan Putin.

Eslatib o‘tamiz, avvalroq Uzoq Sharqda Rossiya tarixidagi eng katta harbiy mashqlar boshlangandi.

Mashqlar 11-17 sentabr kunlari Rossiyaning Uzoq Sharqida va Tinch okeaniga qo‘shni suvlarda ushbu mamlakat mudofaa vaziri Sergey Shoygu rahbarligida o‘tkaziladi. Ta'kidlanishicha, ular so‘nggi 37 yil ichidagi eng katta harbiy mashqlar bo‘ladi. Ularda jami 300 ming harbiy, o‘n minglab zirhli mashinalar, vertolyotlar, samolyotlar va uchuvchisiz uchar qurilmalar qatnashadi. Shuningdek, Mo‘g‘uliston va Xitoydan kelgan harbiylar mashqlarga qo‘shilishi kutilmoqda.