Hukumat qarori: Qolipli non ishlab chiqaruvchi korxonalarga un mahsuloti cheklovlarsiz sotiladi

16 sentabr kuni O‘zbekiston bosh vaziri Abdulla Aripov raisligida Vazirlar Mahkamasi yig‘ilishi o‘tkazildi.

Yig‘ilish kun tartibida respublika aholisini un va non bilan ishonchli ta'minlash chora-tadbirlari ko‘rib chiqildi.

Yig‘ilishda «Mamlakatimiz aholisini va iqtisodiyot tarmoqlarini raqobat va bozor mexanizmlarini joriy etish asnosida don, un va non bilan ishonchli ta'minlash chora-tadbirlari to‘g‘risida»gi qaror ijrosini ta'minlash maqsadida quyidagi qarorlar qabul qilindi:
1. Ichki iste'mol bozoriga mahalliy 1-navli un resurslari uzluksiz va bir tekisda yetkazib berilishini ta'minlash bo‘yicha Vazirlar Mahkamasining Qishloq va suv xo‘jaligi, qishlov xo‘jaligi va oziq-ovqat mahsulotlarini qayta ishlash masalalari ATD, Iqtisodiyot vazirligi, Moliya vazirligi hamda «O‘zdonmahsulot» AKning quyidagi takliflariga rozilik beriladi:
- 2018 yil 17 sentabrdan boshlab «O‘zdonmahsulot» AK tarkibidagi donni qayta ishlash korxonalariga qolipli non ishlab chiqaruvchi korxonalarga hamda chakana savdo tashkilotlari (birinchi navbatda supermarketlar, savdo markazlari, ulgurji savdo tashkilotlari)ga un mahsulotini shartnomalar asosida cheklovlarsiz sotishga;
- 2018 yil 17 sentabrdan boshlab (alohida topshiriq berilgunga qadar) «O‘zdonmahsulot» AK tarkibidagi donni qayta ishlash korxonalariga istisno tariqasida, chakana savdoga ruxsat guvohnomasi talab etilmasdan, 1-navli mahalliy un mahsulotining turg‘un va ko‘chma chakana savdosini amalga oshirishga.

2. «O‘zdonmahsulot» AK tarkibidagi donni qayta ishlash korxonalari tomonidan 1-navli un mahsulotining chakana sotish narxi 1750 so‘m doirasida bo‘ladi.

3. Markaziy bank va Davlat soliq qo‘mitasi birgalikda 1 kun muddatda mahalliy 1-navli un mahsulotining chakana savdosini amalga oshirishga jalb etilgan «O‘zdonmahsulot» AK tarkibidagi donni qayta ishlash korxonalarining buyurtmalari asosida ularni tezkor ravishda to‘lov terminallari bilan ta'minlash hamda chakana sotish joylarini kunlik inkassatsiya choralarini ko‘radi.

4. Davlat Soliq qo‘mitasi, Bosh prokuratura huzuridagi Agrosanoat majmui va oziq-ovqat xavfsizligi ta'minlanishi ustidan nazorat qilish inspeksiyasi «O‘zdonmahsulot» AK tarkibidagi donni qayta ishlash korxonalari tomonidan mahalliy 1-navli un mahsulotini supermarketlar, yirik savdo markazlarida, bozorlarda hamda savdo shoxobchalarida 1 kilogramm 1-navli mahalliy un mahsulotiga chakana narxlar asossiz shakllanishi oldini olish choralarini ko‘radi.

5. Bosh prokuratura huzuridagi iqtisodiy jinoyatlarga qarshi kurashish departamenti va Davlat Soliq qo‘mitasi har bir «O‘zdonmahsulot» AK tarkibidagi donni qayta ishlash korxonasiga xodim biriktirib, un mahsulotlari maqsadli ishlatilishi ustidan doimiy nazorat o‘rnatadi.

6. Qoraqalpog‘iston Respublikasi Vazirlar Kengashi, viloyatlar va Toshkent shahri hokimliklari:
- hududlarda faoliyat ko‘rsatayotgan savdo tashkilotlari hamda qolipli non, makaron va boshqa undan tayyorlanadigan mahsulotlarni ishlab chiqaruvchi korxonalarning ro‘yxatini shakllantirib, ularni uyushgan holda «O‘zdonmahsulot» AK tarkibidagi donni qayta ishlash korxonalaridan un mahsulotini shartnomalar asosida xarid qilishini tashkil etish;
- «O‘zdonmahsulot» AK tarkibidagi donni qayta ishlash korxonalari tomonidan un mahsulotining turg‘un va ko‘chma chakana savdosi amalga oshiriladigan joylarni aniqlab, manzilli ro‘yxat shakllantirish;
- hududlarda faoliyat ko‘rsatayotgan savdo tashkilotlari hamda qolipli non, makaron va boshqa undan tayyorlanadigan mahsulotlarni ishlab chiqaruvchi korxonalarning ro‘yxati shakllantirilib, ularni uyushgan holda «O‘zdonmahsulot» AK tarkibidagi donni qayta ishlash korxonalaridan un mahsulotini shartnomalar asosida xarid qilishni tashkil etish;
- «O‘zdonmahsulot» AK tarkibidagi donni qayta ishlash korxonalari tomonidan un mahsulotining turg‘un va ko‘chma chakana savdosini amalga oshiradigan maxsus joylarning manzili to‘g‘risidagi ma'lumotlar ommaviy axborot vositalari orqali barcha toifadagi iste'molchilarga yetkazilishini ta'minlash choralarini ko‘rish;

7. ​«O‘zdonmahsulot» AK 2018 yil 17 sentabrdan qolipli non ishlab chiqaruvchi korxonalarga, supermarketlar, yirik savdo markazlarida hamda bozorlarda sotilishga mo‘ljallangan 1-navli un hajmlarini kamida ikki barobarga oshiradi.

«O‘zdonmahsulot» AK tarkibidagi donni qayta ishlash korxonalaridan turg‘un va ko‘chma chakana savdosini amalga oshirishga chiqqan har bir yuk tashuvchi avtomashinaga Iqtisodiy kompleks tarkibidagi tashkilotlar xodimi biriktiriladi va ular har kun yakuni bo‘yicha Hududiy ishchi guruhga yozma hisobot beradi.