Ispaniyada Kataloniya, Angliyada London derbisi. Hafta o‘yinlari anonsi
|20:59 / 21.09.201814 86014 min
Yevropada futbol asta-sekinlik bilan tezlikni oshirmoqda. Kechagina jamoalar Yevropa Ligasi guruh bosqichida dastlabki turni o‘tkazishgan bo‘lsa, bir kun o‘tmay, bugundan milliy chempionatlarda navbatdagi tur boshlanadi.
Dam olish kunlarining e'tiborga molik uchrashuvlar anonsi bilan «Tribuna.uz» ham bu o‘yinlarga aloqadorlikda davom etadi.
Bundesligadan Chempionlar Ligasida qatnashayotgan, ya'ni o‘tgan mavsumning omadli 4 jamoasi bu hafta o‘zaro o‘yinlarda maydonga tushishadi.
«Hoffenhaym» ham, «Borussiya» ham yevrokubokdagi ilk o‘yinlarini yaxshi o‘tkazishdi. Dortmundliklarning g‘alabasi avvaldan kutilgan bo‘lsa, «Hoffenhaym» safarda «Shaxtyor» bilan durang o‘ynadi. Juda ko‘p asosiy tarkib futbolchilari jarohat olgan Nagelsman jamoasi uchun Donetskda mag‘lubiyatga uchramaslik ham katta natija.
«Virsol Reyn» stadioni dortmundliklar uchun juda noqulay ekanini ta'kidlash kerak. Bu stadionda ushbu jamoalar o‘rtasida o‘tkazilgan so‘nggi 8 o‘yinda «Borussiya» atigi 1 marotaba g‘alaba qozongan xolos. Masalan, o‘tgan mavsumda shu stadionda o‘tgan o‘yin 3:1 hisobida maydon egalarining g‘alabasi bilan tugagandi. 3 turdan so‘ng 7 ochko jamg‘arib, «Bavariya»ni ta'qib qilayotgan jamoa uchun esa, har o‘yinda g‘alaba qozonish shart ekani shubhasiz.
Tarkiblarga kelsak, mezbonlar tarkibida tiklanib ulgurgan futbolchilar yo‘q. Xyubner ham, Amiri yoki Rupp ham tiklanish jarayonini davom ettirmoqda. Mehmonlardan esa, yangi hujumchi Pako Alkaserning maydonga tushishi so‘roq ostida. Shuningdek, portugaliyalik himoyachi Rafayel Gerreyro jarohatidan forig‘ bo‘ldi va asosiy tarkibda bo‘lmasa ham, balki zaxira o‘rindig‘ida paydo bo‘lib qolishi mumkin.
«ShALKe» – «BAVARIYa» (22 sentabr, 21:30)
Ikkinchi juftlik yanada jarangliroq. «Shalke» faqat o‘tgan yilning hurmati va hozirda Chempionlar Ligasida ishtirok etayotgani uchun uchrashuv ahamiyatini oshirmoqda xolos, zero jamoaning yangi mavsum startiga havas qilib bo‘lmaydi. To‘g‘ri, hozircha jamoa juda qiyin taqvimga tushib qolgan, «Volfsburg», «Herta» va menxengladbaxliklar anoyi raqib emas, ammo bu o‘yinlarda hech bo‘lmasa 1 ochko olish kerak edi. Buning ustiga, ancha qulayroq bo‘lgan guruhda YeChL ham u qadar yaxshi boshlanmadi – «Portu»ga qarshi uy o‘yinida g‘alaba ushlab qolinmadi – 1:1.
«Bavariya» esa, har safargi rejimda, Germaniya kubogi va Superkubogidan tortib, barcha Bundesliga o‘yinlari, shu bilan birga Chempionlar Ligasidagi safar uchrashuvi ham g‘alaba bilan yakunlandi. Yangi murabbiy Niko Kovach qo‘l ostida jamoa juda pragmatik va samarali o‘yin ko‘rsatmoqda.
Mavzuga oid
«Shalke» «Bavariya» ustidan so‘nggi 22 o‘yinda atigi 3 marta g‘alaba qozongan, uning ham oxirgisi 2011 yilning mart oyiga to‘g‘ri keladi. U paytlarda «Shalke» Yevropa Chempionlar Ligasining doimiy ishtirokchisi edi. Shundan buyog‘iga «Shalke» atigi uch marotaba durang qayd etdi xolos, boshqa barcha uchrashuvlar «Bavariya» ustunligida tugagan. Jamoalar roppa-rosa bir yil oldin – 19 sentabrda ham xuddi shu stadionda to‘qnash kelishgan va mehmonlar 3:0 hisobida g‘alabaga erishgandi.
«VeST HEM» – «CheLSI» (23 sentabr, 18:00)
Jamoalar turnir jadvalida bir-biridan juda uzoq joylashishgan. «Chelsi» 5 o‘yinda yuz foizlik natijani ko‘rsatib, peshqadamlik qilayotgan bo‘lsa, «Vest Hem» bu safar ham yomon boshladi – dastlabki to‘rt o‘yinda mag‘lubiyatga uchradi. Lekin bu o‘yinga alohida e'tibor qaratish uchun bir qator sabablar bor.
Birinchidan, «Vest Hem» ijobiy kursga tushib olgandek, chunki «Everton» maydonidagi ishonchli g‘alaba e'tirofga loyiq. Bu o‘yinda jamoaning yangi xaridlari ham o‘zlarini ko‘rsatdi – Yarmolenko dubl qayd etgan bo‘lsa, «Latsio»dan sotib olingan braziliyalik Filipe Anderson jamoa tarkibida eng yaxshi baho olgan futbolchi bo‘ldi. Demak, «Vest Hem» o‘z o‘yinini topib bormoqda.
Ikkkinchidan, bu derbi. London derbilari o‘zining murosasizligi va kutilmagan natijalari bilan e'tibor tortib kelgan. Masalan, «Vest Hem» o‘z maydonida «Chelsi»ga qarshi o‘tkazilgan oxirgi 4 o‘yindan 3tasida g‘alaba qozongan. Axir bu mavsumlarning ikkitasida «Chelsi» chempion bo‘lgan, lekin bu ham «Vest Hem»ni shashtidan qaytara olmagan.
O‘yin yakshanba kuni bo‘lib o‘tadi. Payshanba oqshomida esa, «Chelsi» Yevropa Ligasi doirasida Gretsiyaga safar qildi. Sarri ba'zi yetakchi futbolchilariga dam bergan bo‘lsa-da, umumiy holat yuzasidan «Vest Hem» jismonan tetikroq bo‘lishi va bu ham mezbonlarga ustunlik yaratishi mumkin. Xullas, qo‘shimcha shartlar go‘yoki «Chelsi»ning nihoyat ochko yo‘qotishidan dalolat qilmoqda. Ko‘ramiz, Mauritsio Sarri bu sinovdan o‘z shogirdlarini qanday olib chiqarkin?
«ARSeNAL» – «EVeRTON» (23 sentabr, 20:00)
Yevropa Ligasida APLni himoya qilgan yana bir London klubi ham shu kuni maydonga tushadi. Dastlabki 4 turni mag‘lubiyatsiz o‘tkazgan «Everton» yuqorida aytilganidek, dastlabki mag‘lubiyatiga uchradi.
Ammo «Everton» ham mavsum boshidayoq jarohatlar girdobida qolgandi. Masalan, himoya chizig‘ida to‘p surishi kerak bo‘lgan deyarli barcha futbolchilar lazaretdan chiqqanlari yo‘q. Maykl Kin va Fil Jagelka, shuningdek, yozda «Barselona»dan sotib olingan Yyerri Mina ham jamoaga yordam bera olishmayapti. Leyton Beyns yaxshi sport formasida emas. Natijada, himoyada asosan yosh futbolchilar to‘p surishga majbur bo‘lishmoqda.
«Arsenal» mavsumni ikki mag‘lubiyat bilan boshladi. «Manchester Siti» bilan o‘yinda umuman imkonsiz ko‘ringan Emeri shogirdlari «Chelsi»ga qarshi yomon o‘ynashmadi. Jamoada hammasi joyida ekani keyingi o‘yinlarda isbotini topdi va «Arsenal» qatorasiga uch o‘yinda g‘alaba qozondi. Bu o‘yinlarning ikkitasi safarda o‘tgandi.
«Arsenal» kecha Yevropa Ligasida maydonga tushdi. Bu ham mehmonlarga biroz ustunlik berishi turgan gap, lekin Emerida vaziyatni o‘zgartiradigan qadar noqulaylik yo‘q. Chunki, «Chelsi»dan farqli ravishda «Arsenal» YeL o‘yinini ham, «Everton»ga qarshi o‘yinni ham o‘z maydonida o‘tkazmoqda.
Darvoqe, bu jamoalar to‘qnashuvi doimo gollarga boy va qiziqarli kechsa-da, umumiy ko‘rsatkichlar bo‘yicha «Arsenal» yaqqol ustunlikka ega. So‘nggi 18 o‘yinda «Everton» atigi ikki marotaba g‘alaba qozongan. «Emirayts»da o‘tgan so‘nggi 4 o‘yinda mezbonlar ishonchli g‘alabani qo‘lga kiritishgan.
TsSKA – «SPARTAK» (23 sentabr, 21:00)
Avvallari Moskva derbisi deyilganda asosan «Dinamo» va «Spartak» to‘qnashuvi tushunilgan bo‘lsa, keyinchalik, so‘nggi 30 yilda ham deyish mumkin, qizillarning armiyachilar bilan o‘yini Rossiyadagi eng katta derbisi sifatida qarshi olinadigan bo‘ldi. Chempionatdagi o‘yinlar e'tibori bilan ham, muxlislar soni bo‘yicha ham bu ikki jamoa bir-biriga munosib va har doim juda qizg‘in kurashlarga boy derbini namoyish qilib berishadi.
Bu safar turnir nuqtai nazaridan ham muhim – «Spartak» 7 o‘yindan 14 ochko jamg‘arib, «Zenit»ni oldinga qo‘yib yubormaslikka urinayotgan bo‘lsa, TsSKA u qadar uzoqda emas. Bu o‘yindagi g‘alaba bilan TsSKA «Spartak»ni quvib o‘tishi va 2-o‘ringa chiqib olishi mumkin.
Chempionatda ikki jamoa teskari yo‘nalish hosil qilishdi: «Spartak» mavsumni yaxshi boshlab, so‘nggi turlarda ochko yo‘qotishni boshlagan bo‘lsa, TsSKA o‘z o‘yinini topib boryapti va so‘nggi ikki o‘yinda yirik g‘alabaga erishdi. Chempionlar Ligasida ham Plzenda mag‘lubiyatdan qutulib qoldi. Bu borada Yevropada ham «Spartak»da ishlar yomonroq. Yevropa Ligasi doirasidagi «Rapid»ga qarshi o‘yinda 0:2 hisobida mag‘lubiyatga uchraldi. Bu pasayish qaysidir ma'noda jamoa yetakchisi Kvinsi Promesning ketgani bilan ham izohlanar balki. Oldingi chiziqda «Spartak»ka yetakchilik qila oladigan mohir futbolchi yetishmayapti.
«LION» – «MARSeL» (23 sentabr, 23:55)
Ikki «Olimpik» o‘tgan mavsumda Chempionlar Ligasi yo‘llanmasi uchun keskin kurash olib borishgan va oqibatda lionliklar uloqni ilib ketishgandi. Hozircha balki navbatdagi o‘yin hisoblangan, ammo mavsum yakuniga juda katta ta'sir qilishi mumkin bo‘lgan o‘yin Fransiyaning 6-turini bezaydi.
«Nim»dan qabul qilingan mag‘lubiyatni aytmasa, «Marsel» juda kuchli ko‘rinmoqda, ancha sermahsul o‘yin, Toven – Payyet juftligi, «Monako» maydonidagi g‘alaba... «Lion» biroz soyada qolayotgandi, lekin Chempionlar Ligasida «Manchester Siti» ustidan safardagi g‘alaba butun Yevropaga «Lion»ni namoyish qilib berdi. Toven – Payyet tandemidan kam bo‘lmagan juftlik Depay va Fekir yana katta sahnada.
Manchesterda o‘ziga bo‘lgan ishonchni cho‘qqiga olib chiqqan «Lion» endi Fransiyada ham vaziyatni o‘nglashga kirishadi. Oldinda esa, yuqori o‘rinlarda turgan «Marsel» va «Dijon» bilan o‘yinlar kutib turibdi.
O‘zaro o‘yinlarda «Lion» yaqqol ustunlikka ega, zero o‘tgan mavsumda ham har ikki o‘yinda «Lion» g‘alaba qozongandi. Ayniqsa, Marseldagi o‘yinning so‘nggi daqiqalarida Memfis Depay uzoq masofadan gol urib, 3:2 hisobidagi g‘alaba olib kelgandi. Umuman, Fransiya kubogini qo‘shmasa, «Marsel»ning «Lion» ustidan g‘alaba qozonganiga ancha bo‘ldi. Qatorasiga 8 o‘yin, 2014 yilning may oyidan beri marselliklar g‘alaba qozona olishmayapti.
Tarkiblarga kelsak, «Lion»da hammasi joyida. «Marsel»da nihoyat asosiy darvozabon Mandanda qaytishi mumkin. Odil Rami va Rolando jamoaga yordam bera olishmaydi.
