Netanyaxu: Il-20 voqeasi «ancha jiddiy» oqibatlarga olib kelishi mumkin edi

Isroil bosh vaziri Binyamin Netanyaxuning ma'lum qilishicha, Rossiyaga tegishli Il-20 samolyotining Suriyada qulashi «ancha jiddiy oqibatlarga» olib kelishi mumkin edi. Bu haqda u AQSh prezidenti Donald Tramp bilan uchrashuvdan so‘ng tashkil etilgan matbuot anjumanida aytib o‘tdi, deb xabar bermoqda Isroilning Kan radiosi.

«Rossiya samolyotining qulashi juda jiddiy oqibatlarga olib kelishi mumkin edi», - deya Netanyaxuning so‘zlari keltiriladi.

Shu bilan birga, Isroil bosh vaziri o‘z bayonotini aniqlashtirishdan bosh tortgan.

Radiostansiya manbasining xabar berishicha, Netanyaxu va Rossiya prezidenti Vladimir Putin o‘rtasida yaqinda bo‘lib o‘tgan telefon orqali muloqotda ehtimoliy uchrashuv masalasi ko‘tarilgan. Shunga qaramay, taxminiy sana va joy ma'lum qilinmayapti.

Avvalroq Haaretz gazetasi Rossiya rasmiylari Moskvada Il-20 halokatidan keyin Isroil siyosatchilari delegatsiyasini qabul qilishdan bosh tortgani haqida xabar bergandi. Shunga qaramay, Kreml bu ma'lumotlarni rad etdi. 

Eslatib o‘tamiz, bundan avval Isroil Rossiyaning S-300 zenit raketa komplekslari Suriyaga yetkazib berilishidan tashvishga tushib qolgani haqida ma'lumot berilgandi.