Amalga oshirilishi uchun litsenziyalar talab qilinadigan faoliyat turlari ro‘yxati o‘zgardi
|20:05 / 04.10.201821 26111 min
Foto: SputnikFoto: Sputnik
O‘zbekiston Respublikasining prezidenti Shavkat Mirziyoyev O‘zbekiston Respublikasining ayrim qonun hujjatlariga iqtisodiy munosabatlar va tadbirkorlikni rivojlantirishga qaratilgan o‘zgartish va qo‘shimchalar kiritish to‘g‘risidagi qonunni imzoladi.
Qonun Qonunchilik palatasi tomonidan 2018 yil 30 avgustda qabul qilingan, Senat tomonidan 2018 yil 27 sentabrda ma'qullangan.
O‘zbekiston Respublikasining 1996 yil 25 aprelda qabul qilingan «Banklar va bank faoliyati to‘g‘risida»gi 216–I-sonli Qonuni 4-moddasining ikkinchi qismiga quyidagi qo‘shimcha va o‘zgartish kiritildi:
quyidagi mazmundagi o‘n birinchi xatboshi bilan to‘ldirildi:
«mikroqarz berish»;
o‘n birinchi xatboshi o‘n ikkinchi xatboshi deb hisoblanadi.
O‘zbekiston Respublikasining 2000 yil 25 mayda qabul qilingan «Faoliyatning ayrim turlarini litsenziyalash to‘g‘risida»gi 71–II-sonli Qonuniga quyidagi o‘zgartish va qo‘shimchalar kiritildi:
12-moddaning birinchi va ikkinchi qismlari quyidagi tahrirda bayon etildi:
«Faoliyatning ayrim turlarini amalga oshirish huquqi uchun litsenziyalar ularning amal qilishi muddati cheklanmagan holda beriladi.
Faoliyatning litsenziyalanadigan ayrim turlariga nisbatan qonun hujjatlarida litsenziyaning cheklangan amal qilish muddati belgilanishi mumkin, lekin bu muddat besh yildan kam bo‘lmasligi lozim»;
16-modda:
quyidagi mazmundagi yettinchi va sakkizinchi qismlar bilan to‘ldirildi:
«Agar litsenziyalovchi organ litsenziya berish yoxud litsenziyaning amal qilish muddatini uzaytirish to‘g‘risidagi arizani ko‘rib chiqish muddati davomida litsenziya berish haqida yoki litsenziya berishni rad etish to‘g‘risida yoxud litsenziyaning amal qilish muddatini uzaytirish haqida yoki uning amal qilish muddatini uzaytirishni rad etish to‘g‘risida qaror qabul qilmasa, ko‘rsatilgan muddat o‘tganidan so‘ng litsenziya da'vogari arizada ko‘rsatilgan faoliyat turini amalga oshirish huquqiga bu haqda litsenziyalovchi organni yozma ravishda xabardor qilgan holda ega bo‘ladi.
Ushbu moddaning yettinchi qismida nazarda tutilgan holda litsenziyalovchi organ litsenziya da'vogarining yozma xabari olinganidan keyin besh ish kuni ichida unga litsenziya berishi yoki litsenziyaning amal qilish muddatini uzaytirishi shart. Taqdim etilgan hujjatlarning ular qabul qilib olingan sana to‘g‘risida belgi qo‘yilgan ro‘yxati hamda litsenziya da'vogari tomonidan litsenziyalovchi organga yuborilgan yozma xabar litsenziya olinguniga qadar litsenziyaga tenglashtiriladi va shunday faoliyatni amalga oshirish uchun asos bo‘ladi. Bunda litsenziya da'vogari litsenziyasiz faoliyat bilan shug‘ullanganlik uchun javobgarlikka tortilishi mumkin emas»;
Mavzuga oid
yettinchi — o‘n birinchi qismlari tegishincha to‘qqizinchi — o‘n uchinchi qismlar deb hisoblanadi.
O‘zbekiston Respublikasi Oliy Majlisining 2001 yil 12 mayda qabul qilingan «Amalga oshirilishi uchun litsenziyalar talab qilinadigan faoliyat turlarining ro‘yxati to‘g‘risida»gi 222–II-sonli Qarori 1-ilovasining yigirmanchi — oltmishinchi xatboshilari quyidagi mazmundagi yigirmanchi — ellik beshinchi xatboshilar bilan almashtirildi:
«Avtomobil transportida yo‘lovchilarni va yuklarni shaharda, shahar atrofida, shaharlararo va xalqaro yo‘nalishlar bo‘yicha tashish.
Telekommunikatsiyalar tarmoqlarini loyihalashtirish, qurish, ulardan foydalanish va ularga xizmat ko‘rsatish.
Neft, gaz va gaz kondensatini qazib olish, qayta ishlash hamda realizatsiya qilish.
Qimmatbaho va nodir metallarni, qimmatbaho toshlarni qazib olish.
Neft mahsulotlarini (avtobenzin, aviabenzin, ekstrabenzin, dizel yonilg‘isi, aviakerosin, mazut, pechka qoramoyi, neft bitumi, shuningdek texnik moylar va moylash materiallarini) realizatsiya qilish, bundan zavodda idishlarga qadoqlanganlari mustasno.
Etil spirti va alkogolli mahsulot ishlab chiqarish.
Bank faoliyati.
Banklar tomonidan chet el valyutasida operatsiyalar o‘tkazish.
Qimmatli qog‘ozlar blankalarini ishlab chiqarish.
Qimmatli qog‘ozlar bozoridagi professional faoliyat.
Baholash faoliyati.
Sug‘urtalovchilarning va sug‘urta brokerlarining sug‘urta faoliyati.
Nodavlat ta'lim xizmatlari ko‘rsatish sohasidagi faoliyat.
Diniy ta'lim muassasalarining faoliyati.
Audiovizual asarlarni, fonogrammalarni va EHM uchun yaratilgan dasturlarni takrorlash.
Fonogrammalarni tayyorlash.
Kontsert-tomosha faoliyatini amalga oshirish.
Birja faoliyati.
Turizm faoliyati.
Ulgurji savdo.
Tamaki mahsulotlari ishlab chiqarish.
Mikrokredit tashkilotlari faoliyati.
Pirotexnika buyumlarini (harbiy maqsaddagi mahsulotlardan tashqari) ishlab chiqish, ishlab chiqarish, tashish, saqlash, realizatsiya qilish, ulardan foydalanish, ularni yo‘q qilish va utilizatsiya qilish.
Rieltorlik faoliyati.
Kredit byurolari faoliyati.
Vazirliklar, idoralar va tashkilotlar harbiy xizmatchilari hamda xodimlarining tasdiqlangan namunadagi formali kiyim-boshi savdosi bo‘yicha faoliyat.
Qimmatbaho metallardan va qimmatbaho toshlardan zargarlik buyumlarini hamda boshqa buyumlarni ishlab chiqarish».
O‘zbekiston Respublikasining 2006 yil 15 sentabrda qabul qilingan «Mikromoliyalash to‘g‘risida»gi O‘RQ–50-sonli Qonuniga quyidagi o‘zgartish va qo‘shimchalar kiritildi:
5-moddaning matni quyidagi tahrirda bayon etildi:
«Mikroqarz banklar va mikrokredit tashkilotlari tomonidan jismoniy shaxs bo‘lgan qarz oluvchiga eng kam ish haqining yuz baravari miqdoridan oshmaydigan summada to‘lovlilik, muddatlilik va qaytarish shartlari asosida beriladigan pul mablag‘laridir»;
8-modda:
uchinchi qismi quyidagi tahrirda bayon etildi:
«Mikromoliyaviy xizmatlar ko‘rsatish qoidalari barchaning tanishib chiqishi uchun ochiq bo‘lishi va bu qoidalarda quyidagilar bo‘lishi kerak:
mikromoliyaviy xizmatlar ko‘rsatish shartlari;
mikromoliyaviy xizmatlarning miqdori, muddatlari, to‘lovi va to‘liq qiymati to‘g‘risidagi ma'lumotlar»;
quyidagi mazmundagi to‘rtinchi qism bilan to‘ldirildi:
«Mikromoliyaviy xizmatlar ko‘rsatish shartnomalari bo‘yicha yillik qarz miqdorining yarmidan ko‘pini tashkil etadigan summada foizlar hisoblash, vositachilik haqlari va neustoyka (jarima, penya) undirish, javobgarlikning boshqa choralarini qo‘llash taqiqlanadi»;
14-moddaning birinchi qismi:
quyidagi mazmundagi oltinchi xatboshi bilan to‘ldirildi:
«mikromoliyaviy xizmatlar ko‘rsatish shartnomalari bo‘yicha yillik qarz miqdorining yarmidan ko‘pini tashkil etadigan summada foizlar hisoblashni, vositachilik haqlari va neustoyka (jarima, penya) undirishni, javobgarlikning boshqa choralarini qo‘llashni taqiqlash sharti»;
oltinchi — o‘ninchi xatboshilari tegishincha yettinchi — o‘n birinchi xatboshilar deb hisoblanadi.
O‘zbekiston Respublikasining 2006 yil 20 sentabrda qabul qilingan «Mikrokredit tashkilotlari to‘g‘risida»gi O‘RQ–53-sonli Qonuni 13-moddasining uchinchi qismiga quyidagi qo‘shimcha va o‘zgartish kiritildi:
quyidagi mazmundagi to‘rtinchi xatboshi bilan to‘ldirildi:
«mikromoliyaviy xizmatlar ko‘rsatish shartnomalari bo‘yicha yillik qarz miqdorining yarmidan ko‘pini tashkil etadigan summada foizlar hisoblashga, vositachilik haqlari va neustoyka (jarima, penya) undirishga, javobgarlikning boshqa choralarini qo‘llashga»;
to‘rtinchi xatboshi beshinchi xatboshi deb hisoblanadi.
O‘zbekiston Respublikasining 2016 yil 20 yanvarda qabul qilingan O‘RQ–400-sonli Qonuni bilan tasdiqlangan O‘zbekiston Respublikasining Bojxona kodeksiga quyidagi o‘zgartish va qo‘shimchalar kiritildi:
15-moddaning ikkinchi xatboshisidagi «tegishli ruxsatnoma olgan» degan so‘zlar chiqarib tashlandi;
44-modda birinchi qismining:
uchinchi va to‘rtinchi xatboshilari chiqarib tashlandi;
beshinchi — yettinchi xatboshilari tegishincha uchinchi — beshinchi xatboshilar deb hisoblanadi;
72-modda birinchi qismining:
uchinchi xatboshisi chiqarib tashlandi;
to‘rtinchi — oltinchi xatboshilari tegishincha uchinchi — beshinchi xatboshilar deb hisoblanadi;
275-moddaning birinchi qismi:
quyidagi mazmundagi beshinchi — to‘qqizinchi xatboshilar bilan to‘ldirildi:
«bojxona rasmiylashtiruvi bo‘yicha operatsiyalarni bajarish uchun bojxona nazorati zonasiga kirish;
bojxona masalalari bo‘yicha bojxona organlaridan axborot va maslahatlar olish;
tovarlarni va (yoki) transport vositalarini bojxona hududidan olib chiqish niyati to‘g‘risida bojxona organlarini xabardor qilish;
dastlabki operatsiyalar amalga oshirilayotganda bojxona maqsadlari uchun zarur bo‘ladigan hujjatlarning loyihalarini tayyorlash;
deklaratsiyalanadigan tovarlarni va (yoki) transport vositalarini bojxona omborlariga bojxona nazorati ostida joylashtirish»;
beshinchi xatboshisi o‘ninchi xatboshi deb hisoblanadi;
277-moddaning to‘rtinchi — yettinchi qismlari chiqarib tashlandi;
278, 279 va 280-moddalar chiqarib tashlandi;
282-modda birinchi qismining ikkinchi xatboshisi quyidagi tahrirda bayon etiladi:
«deklarant yoki vakolatli shaxs oldidagi o‘z fuqarolik javobgarligini eng kam oylik ish haqining ming baravari miqdorida sug‘urtalashi»;
283-modda chiqarib tashlandi;
284-moddadagi «O‘zbekiston Respublikasi Davlat bojxona qo‘mitasi tomonidan berilgan malaka attestatiga ega bo‘lgan» degan so‘zlar chiqarib tashlandi;
285-modda chiqarib tashlandi;
286-modda birinchi qismining «ye» kichik bandi chiqarib tashlandi;
287-modda birinchi qismining «l» va «m» kichik bandlari chiqarib tashlandi;
291-modda birinchi qismining:
sakkizinchi va to‘qqizinchi xatboshilari chiqarib tashlandi;
o‘ninchi va o‘n birinchi xatboshilari tegishincha sakkizinchi va to‘qqizinchi xatboshilar deb hisoblanadi;
336-moddaning birinchi qismidagi «278» raqami chiqarib tashlandi;
338-moddaning:
ikkinchi xatboshisi chiqarib tashlandi;
uchinchi — beshinchi xatboshilari tegishincha ikkinchi — to‘rtinchi xatboshilar deb hisoblanadi.
