Zo‘ravon futbolchilarni jiddiy jazo kutmoqda. Ikki do‘stning Moskvadagi sarguzashtlari tafsilotlari

Rossiya terma jamoasining sobiq a'zolari, «Zenit» hujumchisi 27 yoshli Aleksandr Kokorin hamda «Krasnodar» yarimhimoyachisi, 30 yoshli Pavel Mamayevga nisbatan jinoiy ish ochilgan.

Futbolchilar avvaliga Moskva markazida «Pervyy kanal» boshlovchisining haydovchisini, keyinroq kafeda Minpromtorg (Savdo va sanoat vazirligi) mulozimini do‘pposlashda gumon qilinishmoqda. Ularga nisbatan klublari tomonidan ham jiddiy sanksiyalar qo‘llanishi kutilmoqda. OAVda tarqalgan oxirgi xabarlarga ko‘ra, futbolchi qo‘lga olingan. 

8 oktabr kuni internetda futbolchilar Moskvadagi Nikita bulvarida joylashgan «Kofemaniya» kafesida RF Savdo va sanoat vazirligi mulozimi Denis Pakga hujum qilgani tasvirlangan video tarqaldi.

9 oktabr kuni esa kafedagi janjaldan biroz vaqt oldin futbolchilar «Pervyy kanal» boshlovchisining haydovchisini do‘pposlashgani ma'lum qilindi.

Haydovchiga hujum

7 oktabr kuni Peterburgda «Zenit» Rossiya chempionati doirasida «Krasnodar»ni qabul qildi va 2:1 hisobida g‘alaba qozondi. Jarohatidan tuzalib safga qaytgan Kokorin ikkinchi bo‘limda maydonga tushdi, o‘yinni to‘liq o‘tkazgan Mamayev esa mehmonlarning yagona javob goliga mualliflik qildi. O‘yindan keyin futbolchilar Moskvaga yo‘l olishdi. Kokorin o‘z instagramida Mamayev bilan «Do‘stlikning 10 yili»ni nishonlayotgani haqida yozgan.

8 oktabr kuni tongida «Pekin» mehmonxonasi yaqinida Kokorin va Mamayev «Pervyy kanal» boshlovchisi Olga Ushakova va uning haydovchisi — Viktor Solovyovga hujum qilishgan. Bu haqda dastlab Mash xabar tarqatdi, xabarga «Moskovskiy komsomolets» aniqlik kiritdi. Ushakova politsiyaga murojaat qilgan.

Ma'lum bo‘lishicha, Solovyov futbolchilardan bezorilik qilmaslikni, mashinasiga «suykalmaslik»ni so‘ragandi. Bunga javoban futbolchilar haydovchiga tashlanishgan. Telegram-kanal 112 kanalida tarqalgan videoda voqea jarayoni aks etgan. Ammo kuzatuv kameralari orqali olingan tasvirlarda hujum qiluvchilar Kokorin va Mamayev ekani aniq ko‘rinmagan. Ayni vaqtda haydovchi shifoxonaga yotqizilgan, uning burni sinib, miyasi chayqalgan.

Qahvahonadagi zo‘ravonlik

Ko‘chadagi voqeadan 2 soatcha vaqt o‘tib, ushbu futbolchilar ishtirokida navbatdagi janjal yuzaga kelgan. 

Soat 09:00 atrofida Kokorin va Mamayev do‘stlari bilan Nikita bulvaridagi «Kofemaniya» qahvaxonasiga nonushta uchun kirishgan. Mash manbasi yozishicha, futbolchilar «qahvaxonani boshlariga ko‘tarib, shovqin-suron qilishgan». Mijozlardan biri, Savdo va sanoat vazirligi tarkibidagi Avtomobilsozlik va temiryo‘l sanoati departamenti direktori Denis Pak ulardan tinchlanishni so‘raganida esa futbolchilar unga tashlanishgan. Xabarlarda aytilishicha, futbolchilar uni irqiy kamsitishgan va «Xitoyga qaytib, u yerdagilarga aql o‘rgatish»ni tavsiya qilishgan. Videoda Kokorin Mamayev bilan bahslashib turgan Pakning boshiga stul bilan urgani, keyin unga Kokorinning ukasi mushti bilan zarba bergani tasvirlangan. Pakka uning yordamchisi yordamga keladi, lekin uning o‘zi ham hujumga uchraydi.

«Interfaks» agentligi aniqlik kiritishicha, Denis Pak bilan birga vazirlikning yana bir mulozimi, ilmiy markaz direktori Sergey Gasin ham shifoxonaga va politsiyaga murojaat qilgan.

Mash xabariga ko‘ra, futbolchilar mushtlashuv videolarini 5 million rublga sotib olmoqchi bo‘lishgan. Ularning do‘stlari vositachilik qilishgan, ammo tasvirlar avvaliga politsiyaga, keyin OAVga taqdim etilgan.

Qayd etish kerakki, Rossiyada legionerlarga limit mavjudligi sababli mahalliy futbolchilarga talab yuqori va terma jamoaga nomzod bo‘lgan futbolchilarning maoshi baland. Bunday futbolchilar Rossiya chempionatida Angliya jamoalari beradigan miqdorda maosh olishadi va hashamat ichida yashashadi.

Jinoiy ish

Moskva politsiyasi shahar markazida ro‘y bergan bu ikki hodisa bo‘yicha jinoiy ish ochgan.

«Kofemaniya»dagi hodisa bo‘yicha RF Jinoyat Kodeksining 116-moddasi bilan («Kaltaklash») ish ochilgan. Bu modda bo‘yicha 360 soatgacha majburiy jamoat ishlaridan 2 yilgacha ozodlikdan mahrum etish jazosi qo‘llanishi mumkin.

Denis Klimentevich Pakning advokati so‘zlariga ko‘ra, da'vogarlar ish «Bezorilik» sifatida qayta kvalifikatsiyalanishiga erishishmoqchi. Bu holatda futbolchilarga nisbatan RF JKning 213-moddasi qo‘llanib, ularga 300-500 ming rubl miqdoridagi jarimadan 5 yilgacha ozodlikdan mahrum etish jazosi qo‘llanishi mumkin.

Ikkinchi holat bo‘yicha ham 116-modda bo‘yicha ish ochilgan.

Klublarning munosabati

8 oktabr kuni dastlabki xabarlar tarqalganida, «Krasnodar» o‘z futbolchisi «dam olishda» ekani haqida bildirib, bu voqea Mamayevning shaxsiy ishi ekanini ma'lum qilgandi: «Biz kim qayerda ekanini nazorat qila olmaymiz. Bizning vakillarimiz u yerda bo‘lishmagan, klub bu ish ishtirokchisi emas».

9 oktabr kuni esa «Krasnodar»ning munosabati keskin o‘zgardi, Mamayevning ishi «buzg‘unchilik» deb baholandi: futbolchi mashg‘ulotlardan chetlatildi va unga maksimal miqdorda jarima solinishi ma'lum qilindi. Qo‘llanadigan jarima miqdori ma'lum emas. «Krasnodar», shuningdek, bu futbolchi bilan shartnoma bekor qilinishiga erishish uchun barcha choralar ko‘rilishini bildirdi.

«Zenit» ham Kokorin mushtlashuvda ishtirok etganini tasdiqladi, klub uning xatti-harakatlarini «juda xunuk ish» deb baholadi va politsiyaning «huquqiy bahosi»ni kutishni ma'qul ko‘rdi. Sport24.ru telekanali «Zenit» Kokorin bilan shartnomani bekor qilmoqchiligi haqida xabar tarqatdi. Ammo klubning rasmiy ma'lumotida bu haqda aniq gap ketmagan, faqat «futbolchi jazodan qutula olmasligi» keltirilgan.

«Ayni vaqtda «Zenit» rahbariyati va muxlislar mamlakatning eng iste'dodli futbolchilaridan biri o‘zini bu qadar yoqimsiz tutganidan qattiq xafa», deyilgan klub bayonotida. Piterliklarning Kokorin bilan amaldagi shartnomasi 2019 yilgacha tuzilgan. Shartnomada Kokorin qoidalarni qo‘pol ravishda buzgan holatda, u bilan kelishuv bekor qilinishi ehtimoli haqida band mavjud.

Bu Mamayev va Kokorin ishtirokidagi birinchi mojaro emas

2016 yilning yozida Rossiya terma jamoasi bilan Fransiyaga, Yevro-2016 turniri uchun borgan Aleksandr Kokorin va Pavel Mamayev terma jamoa turnirdagi ishtirokini yakunlaganidan keyin bazm uyushtirganida ham tanqidlar ostida qolishgandi. Muxlislar Rossiyaning mag‘lubiyatini hazm qilishga urinishayotganida bu ikki futbolchi Monte-Karlodagi barlardan biriga tashrif buyurib, Rossiya madhiyasi sadolari ostida ko‘ngilxushlik qilishgandi. Bir butilkasi 500 dollar turadigan o‘nlab shampanlar bilan bayram uyushtirgan futbolchilar jamoatchilik noroziligini keltirib chiqarishganidan keyin asosiy terma jamoadan chetlatilgan, shundan keyin Rossiya terma jamoasiga chaqirilmagan. O‘shanda Rossiya Sport vaziri va futbol ittifoqi rahbari bo‘lgan Vitaliy Mutko bu futbolchilar Rossiya sporti imijini buzishgani haqida bayonot bergandi.

Rossiya Sport vazirligining hozirgi rahbari Pavel Kolobkov futbolchilar ishtirokidagi oxirgi voqealarga munosabat bildirib, ular hozir terma jamoa a'zolari emasligi, bundan keyin ham hech qachon terma jamoada o‘ynamasligi haqida bayonot berdi.

Endi nimalar bo‘ladi?

Mamayevning rafiqasi Alana Mamayeva bu voqealarga izoh berar ekan, «ular mast bo‘lishgani, o‘z turmush o‘rtog‘i uchun qattiq uyalayotgani» haqida gapirgandi.

Sport24.ru nashri tarqatgan xabarga ko‘ra esa Mamayeva ajrashish uchun ariza bergan. 

Ayni vaqtda Rossiya jamoatchiligi bu voqeani qizg‘in muhokama qilmoqda va futbolchilar qattiq tanqid ostida qolgan.

Vaziyatga Kreml ham munosabat bildirib, Rossiya prezidenti matbuot kotibi Dmitriy Peskov bayonot berdi.

«Kreml Mamayev va Kokorin bilan bog‘liq voqeaga e'tibor qaratdi. Biz videokadrlarni ko‘rdik. Bu videodagilarning qaysilari qaysi futbolchilar ekaniga aniqlik kiritish lozim.

U yerda ko‘plab guvohlar bo‘lishgan. Videotasvirlar bor. Huquq tartibot organlari uchun bu ish bilan shug‘ullanish ortiqcha murakkablik tug‘dirmaydi, biz esa his-tuyg‘ularga berilishdan qochishimiz kerak »

«360 TV» telekanali politsiya Aleksandr Kokorin va Pavel Mamayevni qo‘lga olgani haqida xabar tarqatdi. Hozircha bu xabar rasman tasdiqlanmadi.