Izsiz yo‘qolgan jurnalist mojarosi. Turkiyaga Saudiyadan delegatsiya keldi

Saudiya Arabistoni delegatsiyasi muxolifatdagi saudiyalik jurnalist Jamol Qoshiqchining Turkiyada izsiz yo‘qolishi bo‘yicha tekshiruv ishlarida qatnashish uchun Anqara shahriga yetib keldi. Bu haqda Anadolu agentligi xabar bermoqda.

Saudiya Arabistoni vakillari Turkiya huquq-tartibot organlari xodimlari hamda tekshiruvda qatnashayotgan boshqa tomonlar bilan uchrashuv o‘tkazadi.

3 oktabr kuni The Washington Post nashri uchun ishlaydigan jurnalist Saudiya Arabistoni konsulligiga kirib ketgach, izsiz yo‘qolgani haqida xabarlar tarqala boshlagandi.

U Saudiya Arabistoni bosh konsulligiga 2 oktabr kuni soat 13:00 atrofida hujjatlarni rasmiylashtirish uchun kelgandi. Uni konsullik xodimlari chaqirishgandi. U konsullikka qallig‘i bilan birga kelgan, biroq ayol ichkariga kiritilmagan. 5 soatdan keyin esa konsullik xodimlaridan biri chiqib, jurnalist ketganini aytib, uni boshqa kutmaslikni tavsiya qilgan.

Jurnalist konsullikka kelishi oldidan agar ushlanadigan bo‘lsa, bu haqda Turkiya hukumati va ommaviy axborot vositalari turk-arab uyushmasini xabardor qilishni aytgandi. 

Turkiya hukumati jurnalist o‘ldirilganini taxmin qilmoqda.

«Turkiya politsiyasining dastlabki taxminiga ko‘ra, janob Qo‘shiqchi Saudiya Arabistoni konsulligida o‘ldirilgan. Fikrimizcha, qotillik qasddan sodir etilgan va jurnalistning jasadi konsullikdan olib chiqib ketilgan», deya turkiyalik mansabdor shaxs so‘zlarini keltirgan Reuters axborot agentligi.

Turklar jurnalistning o‘limida 15 kishidan iborat guruhni gumon qilishmoqda.

9 oktabr kuni Turkiya hukumati jurnalistning yo‘qolib qolishi voqeasidan so‘ng Saudiya Arabistonining Istanbuldagi bosh konsulligi binosida tintuv o‘tkazishga ruxsat oldi.

Turkiya prezidenti Rajab Toyyib Erdo‘g‘an saudiyalik jurnalistning yo‘qolishi tergovini shaxsan kuzatib borishini ma'lum qilgan.

Washington Post nashri xabariga ko‘ra, Turkiya hukumati AQShga, go‘yoki, Saudiya Arabistonining jurnalist Jamol Qoshiqchining o‘ldirilishiga aloqadorligini tasdiqlovchi videoyozuvlarni ko‘rsatgan.

Bunda gap Saudiya Arabistonining Turkiyadagi elchixonasida olingan audio va videoyozuvlar haqida bormoqda. Ularda jurnalistni elchixona binosida so‘roq qilishgani, qiynashgani va oxir-oqibat o‘ldirishganini eshitish mumkin.

Saudiya Arabistoni esa jurnalist konsullik binosidan chiqqach, g‘oyib bo‘lganini iddao qilmoqda.

Jurnalist Ar-Riyodning hozirgi siyosati bo‘yicha tanqidiy qarashlari bilan tanilgan. 

U 2017 yilda Saudiya Arabistonini tark etib, AQShda qo‘nim topgan. Jamol Qoshiqchi Amerika nashri uchun doimiy ravishda maqolalar yozib, unda Saudiya Arabistonidagi vaziyat va tashqi siyosatni tahlil qilgan hamda qirollik hukumati faoliyatining muammoli jihatlarini ochiqcha bayon qilardi. U bir muncha vaqt Saudiya Arabistonida chop etiluvchi Al-Watan nashri bosh muharriri bo‘lgan.