«Obod mahalla»ga kirmagan joylar obod qilinmaydimi? Yangihayotliklar va'dalardan charchadi

«Kun.uz» fuqarolarni qiynayotgan muammolarni yoritishda va bunga jamoatchilik e'tiborini qaratishda davom etadi. Tahririyatimizga O‘rta Chirchiq tumani Yangi hayot mahallasi Eram ko‘chasida istiqomat qilayotgan fuqarolar nomidan yo‘llangan murojaat kelib tushdi. Murojaatni o‘rganish maqsadida ijodiy guruhimiz bilan O‘rta Chirchiq tumaniga yo‘l oldik.

Viloyat markazi Nurafshon shahridan unchalik uzoqda bo‘lmagan Eram ko‘chasiga burilar ekanmiz, mahalla yangi vujudga kelgan mahallalardan ekaniga ko‘zimiz tushdi. Mahalladagi mavjud uylar chala bitgan bo‘lsa-da, 80% aholi ko‘chib kelib yashamoqda. Aholining so‘zlariga qaraganda oldingi yashash joylari davlat ehtiyojlari uchun olingan va uy-joy qurish uchun shu yerlardan joy berilgan.

Youtube'da ko‘rish

Facebook'da ko‘rish

Aholini qiynayotgan muammolardan eng asosiysi ko‘chalarning asfalt qilinmaganligi va buning natijasida issiq kunlarda chang va yomg‘irli mavsumda loygarchilikdan aziyat chekayotganligi haqida edi. Ko‘chalarni kuzatar ekansiz, beixtiyor nigohingiz yo‘llarning ayanchli ahvolda ekanligiga tushadi. Ko‘chaga qadam bosishimiz bilan oyog‘imiz loyga botdi. Bu ko‘chalarga bir marta kirgan odamning qaytib oyoq bosgisi kelmaydi. Biroq, bu yerda sabr qilib yashayotganlarni oldinda butun bir kuz-qishning yog‘ingarchilik to‘la kunlari kutib turganini o‘ylab dilingiz xira tortadi. Hali yomg‘ir bir marta sepalab o‘tgandayoq bu ko‘chalar allaqachon loyga botgan. Ko‘lmak suvlar to‘planib, qayerga chiqishini bilmaydi. Aholining so‘zlariga qaraganda, bu muammolarni bartaraf etishda amaliy yordam so‘rab ko‘p joylarga shikoyatlar yo‘llangan. Natijasi esa ko‘rib turganimizdek.

“Buyog‘iga kuz-qish mavsumi, yog‘ingarchiliklar ko‘payadi. Yurib bo‘lmay qoladi bu ko‘chalarda. Farzandlarimiz maktabga borishadi. Katta ko‘chaga chiqqunicha hammayog‘i loy bo‘lib, ba'zida uyga qaytib ham kelishadi. Barcha birdek qiynalmoqda, bolalarimizni ko‘chagacha boshqa oyoq kiyimda olib chiqib, yo‘lga chiqqandan keyin boshqasini kiydirib yuboramiz. Yangi ko‘chib kelganmiz. Uylarimizni ham haligacha to‘liq bitira  olmadik. Elektr, simyog‘ochlarni ham o‘z hisobimizdan qildik. Lekin yo‘lni ta'mirlashga aholining moddiy imkoniyatlari yetmaydi. 2016 yildan buyon yordam so‘rab yo‘llagan murojatlarimiz javobsiz qolmoqda. Faqat kelishadi, ko‘rishadi, va'da berishadi - natija esa yo‘q. Hech bo‘lmasa shag‘al to‘kib berishsayam rozi edik”,- deydi mahallada yashovchi fuqarolardan biri.

Ma'lum bo‘lishicha, bu mahalla 2018 yil may oyida «Obod mahalla» dasturiga kiritilgan bo‘lib, sentabr oyigacha ishlar yakunlanishi kerak edi. Lekin noma'lum sabablarga ko‘ra mahalla dasturdan chiqarilgan.

O‘rta Chirchiq tumani hokimining 2016 yil mart oyidagi 168-sonli qarorining 3- bandida: “Yangi yer uchastkalari ajratilgan «Qumovul» qishloq fuqarolari, Nurafshon, Yangi hayot, O‘chog‘li, Yangiobod mahallalarini obodonlashtirish, yo‘l-kommunikatsiya (gaz,elektr, ichimlik suvi) tizimlarini yo‘lga qo‘yishda amaliy yordam ko‘rsatish Toshkent viloyati hokimligidan so‘ralsin”,- deb ko‘rsatilgan.

Ushbu vaziyatga izoh olish maqsadida O‘rta Chirchiq tuman hokimligiga qarab yo‘l oldik. Bizni tuman hokimining yordamchisi kutib olib, hokim yo‘qligini, paxta yig‘im-terimi masalalari bo‘yicha hududda yurganligini aytdi. Iltimosimizga ko‘ra tuman hokimining sanoatni rivojlantirish, kapital qurilish, kommunikatsiyalar va kommunal xo‘jalik masalalari bo‘yicha o‘rinbosari Nodir To‘laganov va Avtomobil yo‘llar qurilishi O‘rta Chirchiq tumani boshqarmasi boshlig‘i Alisher Alimov biz bilan  suhbatlashishdi. N.To‘lyaganov Yangi hayot mahallasining aholisi ushbu masalada ko‘pdan beri murojaat yo‘llab kelayotganligini, o‘zi hududga borib bir necha bor o‘rganganligini ta'kidlab o‘tdi. Lekin «Obod mahalla» dasturidan chiqarib yuborilganligi tufayli pul ajratilmaganligini, shuning uchun bu yerda amalga oshirilishi lozim bo‘lgan yo‘l qurilishi ishlari qolib ketganligini ma'lum qildi.

“Bizga qachonki tegishli tashkilotlar kafillik berib, mablag‘ o‘tkazib bersa bu hududda tegishli ishlarni bajaramiz. Hozirda faqat belgilangan rejadagi yo‘llarni tuzatyapmiz, lekin hokimlik bilan kelishib shu oktyabr oyining oxirigacha hech bo‘lmaganda shag‘al to‘kib beramiz, keyingi yildan dasturga kiritib albatta, asfalt qilamiz”,- deb ta'kidlab o‘tdi biz bilan suhbatda Alisher Alimov.

Mutasaddilarning va'dasiga ishondik. Biroq mahalla ahli bu va'dalarga shubha bilan qaramoqda. Yana o‘sha savollar gir aylanmoqda. Xaqiqatdan ham oy oxirigacha shag‘al to‘kib beriladimi yoki Yangi hayot mahalla aholisi loy ko‘chalarda loyga qorishib yana bir kuz-qishni o‘tkazishadimi? Shu mahallada unib-o‘sayotgan bolalar qishning izg‘irinli kunlarida maktabga qanday qatnashadi? Dasturga kiritilib, lekin noma'lum sabablarga ko‘ra dasturdan chiqarib yuborilgan mahallalar obod qilinmaydimi? Mutasaddilarning va'dalari bajariladimi? Yangi hayot mahallasi fuqarolari qachon rozi qilinadi?

O‘ylaymizki, mutasaddi rahbarlar bu muammoga e'tibor qaratishadi. Berilgan va'dalar oyning oxirigacha bajariladi.

Voqealar rivojini kuzatishda davom etamiz.