Putin O‘zbekiston Rossiyaning ishonchli ittifoqchisi ekanini ta'kidladi

19 oktabr kuni Rossiya Federatsiyasi prezidentini rasmiy kutib olish marosimidan so‘ng Shavkat Mirziyoyev va Vladimir Putin tor doirada muzokara o‘tkazdi.

Prezident matbuot xizmati xabariga ko‘ra, Vladimir Putin davlat rahbariga taklif uchun minnatdorlik bildirib, O‘zbekiston Rossiyaning ishonchli ittifoqchisi, strategik sherigi ekanini ta'kidladi.

Prezidentning Rossiyaga o‘tgan yilgi davlat tashrifidan keyin ikki tomonlama munosabatlarning hamma sohalarida asosli o‘zgarishlar bo‘lganini, Rossiya mamlakatimiz bilan hamkorlikni bundan buyon yanada rivojlantirish niyatida ekanini qayd etdi. 

Uchrashuvda amaliy hamkorlikni kengaytirish, turli sohalarda yangi qo‘shma loyiha va dasturlarni amalga oshirish masalalari muhokama qilindi, xalqaro va mintaqaviy ahamiyatga molik masalalar yuzasidan fikr almashildi.