Normativ-huquqiy hujjatlar loyihalari muhokamasi portalida Vazirlar Mahkamasining “Tayanch o‘rta va o‘rta ma'lumot to‘g‘risidagi shahodatnomalarning davlat namunasini tasdiqlash haqida”gi qarori loyihasi joylashtirildi.
Hujjat bilan tayanch o‘rta ma'lumot to‘g‘risidagi shahodatnomaning namunasi; O‘rta ma'lumot to‘g‘risidagi shahodatnomaning namunasi; Psixik rivojlanishida nuqsoni bo‘lgan bolalar uchun ixtisoslashtirilgan maktab (maktab internati)ni tamomlaganlik to‘g‘risidagi maxsus guvohnoma namunasi; Ma'lumot to‘g‘risida davlat namunasidagi rasmiy hujjatlarni umumiy o‘rta ta'lim maktablari bitiruvchilariga berish tartibi to‘g‘risidagi Nizom tasdiqlanadi.
O‘zbekiston Respublikasi Markaziy banki huzuridagi «Davlat belgisi» davlat ishlab chiqarish birlashmasi Xalq ta'limi vazirligi buyurtmasiga muvofiq zarur miqdordagi shahodatnomalar va guvohnoma blankalarini Moliya vazirligi bilan kelishilgan holda chop etadi.
O‘zbekiston Respublikasi Moliya vazirligi Xalq ta'limi vazirligi taqdim etgan smeta asosida umumiy o‘rta ta'lim maktablari bitiruvchilariga beriladigan shahodatnomalar va guvohnoma blankalarini chop ettirish uchun sarflanadigan mablag‘larni belgilangan tartibda ajratadi.
Xalq ta'limi vazirligi 2018-2019 o‘quv yilidan boshlab 9-sinf bitiruvchilari uchun Tayanch o‘rta ma'lumot to‘g‘risida, 11-sinf bitiruvchilari uchun O‘rta ma'lumot to‘g‘risida davlat namunasidagi shahodatnomalar, Psixik rivojlanishida nuqsoni bo‘lgan bolalar uchun ixtisoslashtirilgan maktab (maktab internati)ni tamomlaganlik to‘g‘risidagi maxsus guvohnoma berilishini ta'minlaydi.
Tayanch o‘rta ma'lumot to‘g‘risida davlat namunasidagi shahodatnoma tavsifiga ko‘ra, umumiy o‘rta ta'lim maktablarining 9-sinfini bitirganlik to‘g‘risidagi shahodatnoma 100x145 mm o‘lchovda, vertikal joylashgan, muqovasi to‘q havorang (a'lo darajali shahodatnoma — to‘q qizil) rangda bo‘ladi. Muqovaning yuqori qismiga o‘zbek tilida «O‘ZBEKISTON RESPUBLIKASI», quyi qismiga «TAYANCH O‘RTA MA’LUMOT TO‘G‘RISIDA SHAHODATNOMA», a'lo darajali shahodatnomaga «TAYANCH O‘RTA MA’LUMOT TO‘G‘RISIDA A‘LO DARAJALI SHAHODATNOMA» so‘zlari yoziladi va markaziga O‘zbekiston Respublikasi Davlat Gerbi tasviri oltin zar qog‘ozda, issiq bosma usuli bilan tushiriladi.
Muqova yuqori sifatli, tashqi ta'sirlarga chidamli, qalinligi 300 mkm. materialdan tayyorlanadi.
Shahodatnomaning ichki qismi qalin qog‘ozga ofset bosma usulida ikki rangda: matn qismi qora va tasviriy elementlar havo (a'lo darajali shahodatnoma oltin) rangda bosiladi.
