Tadbirkorga yer berilmayapti: Navoiyda prezident topshirig‘i qachon bajariladi?

Video: YouTube

{Yii::t(}

O'tkazib yuborish 6s

O'tkazib yuborish

Video: TasIX

Joriy yilning 30 iyul kuni Kun.Uz saytida “Prezidentdan ko‘mak olishga erishgan tadbirkor qiz qanday to‘siqlarga uchramoqda?” sarlavhali tanqidiy maqola e'lon qilingan edi. Shundan so‘ng, tuman hokimligi 2018 yil avgustida tahririyatga maktub yo‘llab, mazkur tadbirkor muammosi ijobiy hal etilayotgani, bino va inshootlar qurish uchun 3,5 gektar yer ajratib berish masalasi ijobiy hal etilgani, ozuqa bazasini shakllantirish uchun 7,4 gektar yer maydoni ajratish masalasi ko‘rib chiqilayotgani haqida ma'lum qilgandi. Xo‘sh, yosh tadbirkor ayol muammolari haqiqatda barham topdimi? Tanqidiy maqoladan so‘ng, uning faoliyati nechog‘li o‘zgardi? Tahririyat tasvirga olish guruhi Navoiy viloyatiga navbatdagi safari chog‘ida Navbahor tumanidagi “Dovud ota kelajagi” parrandachilik xo‘jaligiga ham borib, saytda e'lon qilingan maqoladan so‘ng, mutasaddi idoralar tomonidan haqiqatda qanday choralar ko‘rilganiga qiziqdi. Odatdagidek, dastlab murojaatchi bilan uchrashish maqsadida sobiq pochta binosiga boramiz. 

Bu bino prezidentning Navoiy viloyatiga tashrifi chog‘ida bergan topshirig‘iga binoan “nol” qiymatda broyler jo‘jalarini boqishi uchun Gulhayoga taqdim etilgan. 400 mln so‘m kredit ajratilgani, Damas avtomashinasi yetkazib berilgani haqida ham avvalgi lavhamizda so‘z yuritilgandi. Biroq, ozuqa bazasini shakllantirish, tovuqlarni so‘yish, go‘shtini saqlash uchun muzxona qurishga yer ajratish borasida hamon “eski hammom, eski tos” desak mubolag‘a bo‘lmaydi. Muammo hanuz o‘sha-o‘sha. Yer ajratilmayapti. 

Yosh tadbirkor oila yer masalasida hatto Toshkentga Prezident qabulxonasigacha borishga majbur bo‘lgan. U yerdagilar masala hal etilishini aytishgan hamda javob maktubini Navoiy viloyat prokuraturasiga yuborgan. “Tuman hokimligi esa, prokuraturaga yer ajratilgani xususida yolg‘on ma'lumot berdi. Lekin, hammasi ko‘zbo‘yamachilik, menga hech kim yer ajratib bergani yo‘q”, - deydi Gulhayo.

Gulhayo Ergasheva va turmush o‘rtog‘i ayni vaqtda ta'minotchi ham bo‘lishgani, biroq ko‘p hollarda ularning mahalladagi jo‘ja boqayotgan xonadonlarga yetkazib berayotgan mahsulotlari uchun mablag‘lar o‘z vaqtida o‘tkazib berilmayotganidan nolishdi. Ular bir necha ming jo‘jani o‘z mablag‘lari hisobidan boqishga majbur bo‘lishmoqda. 2-3 kun qarovsiz qolgan broylerlar zaiflashib, nobud bo‘lishi hech gap emas. 

Ta'kidlash o‘rinliki, joy va yer muammosi jiddiyligi, biroq olgan kredit uchun har 15 kunda 18 mln so‘m to‘lashi darkorligi, buning uchun boqilayotgan jo‘jalar sonini oshirishga majbur bo‘lgani sababli Gulhayo o‘zlari yashab turgan hovlisida ham jo‘ja boqishga majbur bo‘lmoqda. Bunga o‘zimiz guvoh bo‘ldik. Qo‘lansa hid uyga kirmasimizdan dimoqqa uriladi. Darvozaxonadan kirganda uyning teng yarmi jo‘jalarga ajratilgan. 
Tadbirkor qiz, yer ajratib berilganida, muzxona, kushxona hamda 40-50 mingta jo‘jani boqishga mo‘ljallangan bino qurish, Germaniyadan broyler jo‘ja ochadigan zamonaviy inkubator olib kelishni rejalashtirgani, ammo hozircha, bu rejalar faqat xomxayol bo‘lib qolayotganini ta'kidladi.   

Biz tadbirkor oila uyidan chiqib, tuman hokimligi tomon yo‘l olamiz. Bu yerda tuman hokimining iqtisodiy masalalar bo‘yicha birinchi o‘rinbosari Bahrom Rahmonov bilan uchrashdik hamda “Dovud ota kelajagi” tadbirkorlik sub'yektiga yer ajratish uchun nima to‘sqinlik qilayotganiga qiziqdik. 

“Haqiqatdan ham javob xati berilgan. Tadbirkor qizning turmush o‘rtog‘i bilan borib, 32-konturda 7,4 gektar yer maydoni ko‘rib, o‘sha joy ajratilishi kerak edi. Bu borada talabgorning rozilik xati ham olingan. Biroq, yerdan foydalanib kelgan avvalgi fermer bu yer maydonini hokimlik noqonuniy olib qo‘yganini da'vo qilib, murojaatlar qilavergach, yerni yangi tadbirkorga berishni to‘xtatdik”, - dedi tuman kadastri mutaxassisi.  

Shundan so‘ng, B.Rahmonov tadbirkorning o‘zini hokimlikka chaqirib, dardini eshitib ko‘rish borasidagi taklifimizni ma'qullab, ularni chaqirtirdi. Hokim muovini bilan suhbatimiz tadbirkorlar ishtirokida davom etdi. 

Xullas, hozircha, tuman hokimligi mulozimi tadbirkorga yer ajratib berish masalasini ijobiy hal etilishiga ko‘maklashish, uni har tomonlama qo‘llab-quvvatlashga va'da berdi. Ijrosi qachon va qanday bo‘lishini vaqt ko‘rsatadi. KUN.UZ tahririyati esa, bu mavzuga yana qaytadi.