Eng yaxshi oliy ta'lim muassasasi nomi e'lon qilindi

Scopus  versiyasiga ko‘ra, Mirzo Ulug‘bek nomidagi O‘zbekiston  Milliy universiteti eng yaxshi universitet sifatida e'tirof etildi. KUN.UZ muxbiri “Scopus Award 2018” O‘zbekistonning  yaxshi olimlari va oliygohlarini taqdirlash marosimidan shu haqida xabar berdi.

Shuningdek O‘zbekiston Respublikasi Fanlar Akademiyasi “Ilm-fanga qo‘shgan hissasi uchun” mukofotini qo‘lga kiritdi. Toshkent Pediatriya tibbiyot institutiga “Yil o‘sishi” nominatsiyasida hamda Toshkent irrigatsiya va melioratsiya institutiga “Yil yutuqlari” nominatsiyasida mukofot topshirildi.

Bundan tashqari, Scopus ma'lumotlari bo‘yicha Samarqand Davlat universiteti kutubxonasi O‘zbekistondagi eng yaxshi kutubxona deb tan olindi.

Tadbirda shuningdek fizika, kimyo, kosmologiya, innovatsion tadqiqotlar, tibbiyot, gumanitar fanlar, tabiiy fanlar, ijtimoiy fanlar, injiniring va zamonaviy texnologiyalar bo‘yicha ilmiy ishlar olib borgan qator olimlar taqdirlandi.

“SCOPUS AWARD-2018” doirasida taqdirlangan olimlar:

• «Yil olimi» nominatsiyasida – Dilshod To‘laganov (Toshkent shahridagi Turin politexnika universiteti), Temurbek Usmonov, Bobomurod Ahmedov (O‘zbekiston Fanlar akademiyasi);
• “Eng yosh olim” nominatsiyasida – Mirabbos Xo‘jamberdiyev;
• “Yil olimasi” nominatsiyasi – Shahlo Turdiqulova.

Taqdirlash marosimida olti fan kategoriyasida ham eng yaxshi mualliflar aniqlandi: Ibrohim Abdurahmonov - qishloq xo‘jaligi, Olim Ro‘zimurodov - injiniring va texnologiya, Raufxon Salaxodjayev - gumanitar fanlar, Ulug‘bek Abdufattoyev - tibbiyot, Bahrom Umirov - tabiiy fanlar, Xegay Tatyana - ijtimoiy fanlar.

Mover.uz'da ko‘rish

Youtube'da ko‘rish