Shavkat Mirziyoyev Shovotdagi to‘qimachilik korxonasiga bordi

Davlat rahbari ikki yil muqaddam Uztex kompaniyalar guruhiga Shovot tumanida yuqori texnologik imkoniyatlarga ega mazkur korxonani tashkil etish va mahalliy aholini ish bilan ta'minlash yuzasidan topshiriqlar bergan edi, deb xabar qilmoqda prezident matbuot xizmati.

O‘tgan davrda ilgari mavjud bo‘lgan korxona negizida ilg‘or texnologiyalar bilan jihozlangan, mingdan ortiq ish o‘rniga ega “Katqal’a teks” korxonasi ishga tushirildi.

Loyiha qiymati 65 million dollar bo‘lgan korxona faoliyati ikki bosqichda tashkil etildi. 2017 yilda amalga oshirilgan dastlabki bosqichda Italiyaning “Lonati” kompaniyasida ishlab chiqarilgan 528 ta, joriy yilda yana 512 ta paypoq to‘qish dastgohi xarid qilindi. Ushbu dastgohlar Buyuk Britaniyaning “Maritex Industrial LLP” kompaniyasi tomonidan keltirib o‘rnatildi.

Bugungi kunda korxonada turli o‘lchamdagi ayollar, erkaklar va bolalar paypoqlari ishlab chiqarilmoqda. Yiliga 70 million juft, qiymati 30 million dollarlik paypoq tayyorlash quvvatiga ega qo‘shma korxonada ishlab chiqarish jarayoni to‘liq innovatsion texnologiyalar asosida boshqariladi.

O‘tgan yili korxonada 5,7 milliard so‘mlik mahsulot ishlab chiqarilib, ichki bozorga yo‘naltirildi. Joriy yildan to‘la quvvat bilan ishlay boshlagan korxonada oktabr oyi holatiga ko‘ra 12,5 million juft paypoq to‘qildi. 3,85 million dollarlik mahsulot AQSh, Rossiya, Moldova, Ukraina kabi qator mamlakatlarga eksport qilindi.

Prezident korxona qoshida tashkil etilgan logistika markazi, to‘quv, qadoqlash sexlari, laboratoriya faoliyati bilan tanishdi, ishchilarga yaratilgan shart-sharoitlar bilan qiziqdi.

Mazkur korxona texnologik imkoniyatlariga ko‘ra dunyoda sanoqli, Markaziy Osiyoda yagona fabrikadir. Korxonada ayni kunda paypoq, sochiq kabi to‘qimachilik mahsulotlarining yangi modellarini o‘zlashtirish va eksport hajmini oshirish bo‘yicha ish olib bormoqda.

Iqtisodiyotga qo‘rqmasdan investitsiya kiritish, ichki va tashqi bozorda raqobatbardosh mahsulotlar ishlab chiqarishni yo‘lga qo‘yish bo‘yicha yaratilgan sharoitlar tufayli bugun tadbirkordan qo‘rquv yo‘qoldi. Korxona quraman, ish o‘rni yarataman degan ishbilarmonlarga hech qanday to‘siq yo‘q, biznes uchun barcha kafolatlar yaratilgan. Bundan xorijiy hamkorlar ham xabardor bo‘lib, eksportga hissa qo‘shmoqda, dedi davlat rahbari.  

Shu yerda Xorazm viloyatida to‘qimachilik sanoatini rivojlantirish, “Dererlop Textile” MChJ tomonidan “Hazorasp” erkin iqtisodiy zonasi hududida yengil sanoat majmuasi tashkil etish, Shovot tumanida aralash va paxta ip-kalava ishlab chiqarish bo‘yicha yangi yigiruv fabrikasi qurish, Urganch shahrida “Textile finanse Horezm” MChJ tomonidan tayyor trikotaj mahsulotlari ishlab chiqarish, Toshkent viloyati Parkent tumanida Uztex Zarkent sanatoriysini barpo etish loyihalari haqida ma'lumot berildi.

Davlat rahbari yengil sanoat tarmog‘ini jadal rivojlantirish,  mahsulot eksportini kengaytirish, qo‘shimcha daromad manbalari va ish joyini ko‘paytirish bo‘yicha ko‘rsatmalar berdi.

 Eslatib o‘tamiz, avvalroq Prezident Xorazmga yetib borgani xabar qilingandi.