Mbappe jahonning eng yaxshi yosh futbolchisi deb topildi

Fransiya terma jamoasi va «PSJ» hujumchisi Kilian Mbappe jahonning eng yaxshi yosh futbolchisi deb e'tirof etildi. U France Football tomonidan yangi ta'sis etilgan Raymon Kopa nomidagi mukofotga sazovor bo‘ldi.

Ushbu sovrin uchun kurashda Mbappe «Liverpul» himoyachisi Trent Aleksander-Arnold, «Milan» hujumchisi Patrik Kutrone va shu klub darvozaboni Janluiji Donnarummani ortda qoldirdi.

Eslatib o‘tamiz, 19 yoshli Kilian yozda Fransiya terma jamoasi bilan Jahon chempionatida g‘olib chiqdi va mundialning eng yaxshi yosh o‘yinchisi deb topildi.

Mbappe «PSJ»ga 2017 yil yozida «Monako»dan 135 mln yevroga kelib qo‘shilgan edi. Fransiya chempionatining ushbu mavsumida u 10ta o‘yinda qatnashib, 12ta gol urgan hamda jamoadoshlariga 4ta samarali pas uzatgan.