Davletov: Iqtisodiy sohadagi eng katta muammolar - yer va bank resurslarini ajratish

O‘zbekistonda tadbirkorlik bilan shug‘ullanuvchi shaxslar 2 yo‘nalishdagi muammolarga duch kelyapti: tadbirkorlik uchun yer ajratish va bank muassasalaridan kredit olish masalasi. Bu haqda Adliya vaziri Ruslanbek Davletov Kun.uz'ga bergan intervyusida aytib o‘tgan. 

Video: Tasi-IX

Video: You Tube

«Iqtisodiy sohadagi qonunchilik tahlili bizning katta yo‘nalishlarimizdan biri. Bu yilning o‘zida litsenziyalar turi va sonini tubdan qisqartirish Prezident qarori qabul qilingan. Adliya vazirligi buning ijrochisi edi», - deb so‘z boshlagan vazir.

Davletovga ko‘ra, yer ajratish va bank resurslari, kreditlarga bo‘lgan talabning yuqori ekanligi, sohada katta muammolarga sabab bo‘lmoqda. 

«Hamma aytadi: «Mening g‘oyam - eng yaxshisi. Shu g‘oyamni amalga oshirishim kerak, uning uchun menga yer berilishi kerak», deydi. Bu sohadagi qonunchilikda ham o‘zgarishlar bo‘ldi. Yerlar endi e-ijro orqali sotiladi», - deydi u. 

Prezidentning qaroriga ko‘ra, yer ajratib berish masalasida viloyat hokimlariga eksklyuziv huquq va vakolat berilgan. Ya'ni, eksperiment asosida hududlarni qisqa fursatda rivojlantirish uchun hokim belgilangan tartibda bo‘sh yerlarni tadbirkorga berishi mumkin. Biroq, bu vakolat korrupsiyaga olib keladimi? 

Vazir Ruslanbek Davletovga ko‘ra, yer ajratib berish tartibi va uning mexanizmlari kuchli nazorat ostida olib boriladi. Bu ishda Prezident Administratsiyasidan ham mas'ul shaxslar tayinlangan.

Shunga qaramay, 2018 yil davomida Samarqand viloyat hokimi, Yunusobod tuman hokimi va boshqa ayrim mutasaddi rahbarlar aynan yer ajratib berish ishida amalga oshirilgan korrupsiyaga aloqadorlikda ayblangandi.