Ish beruvchilarga xodimlar ish haqi miqdorini oshirish tavsiya etildi – Prezident byudjyet parametrlari to‘g‘risidagi qarorni imzoladi

O‘zbekiston Respublikasi Prezidenti Shavkat Mirziyoyev «2019 yilgi asosiy makroiqtisodiy ko‘rsatkichlari prognozi va davlat byudjyeti parametrlari hamda 2020-2021 yillarga byudjyet mo‘ljallari to‘g‘risida»gi qarorni imzoladi.

Unda 2019 yilda to‘lanadigan soliq va majburiy to‘lovlarning miqdori belgilab berildi.

Qarorda quyidagilar keltirilgan:

1. O‘zbekiston Respublikasini rivojlantirishning 2019 yilgi asosiy makroiqtisodiy ko‘rsatkichlari prognozi hamda 2020-2021 yillarga maqsadli mo‘ljallari 1-ilovaga muvofiq;

O‘zbekiston Respublikasining 2019 yil uchun konsolidatsiyalashgan byudjyeti jamlanma parametrlari hamda 2020-2021 yillarga byudjyet mo‘ljallari 2-ilovaga muvofiq;

O‘zbekiston Respublikasining 2019 yilgi Davlat byudjyeti asosiy parametrlari 3-ilovaga muvofiq;

O‘zbekiston Respublikasi Moliya vazirligi huzuridagi byudjyetdan tashqari Pensiya jamg‘armasining (keyingi o‘rinlarda – Pensiya jamg‘armasi), O‘zbekiston Respublikasi Bandlikka ko‘maklashish davlat jamg‘armasining, O‘zbekiston Respublikasi Xususiylashtirilgan korxonalarga ko‘maklashish va raqobatni rivojlantirish davlat qo‘mitasi huzuridagi Xususiylashtirilgan korxonalarga ko‘maklashish jamg‘armasining 2019 yil uchun asosiy parametrlari 4-6-ilovalarga muvofiq tasdiqlansin.

2. 2019 yil uchun:

yagona soliq to‘lovi stavkalari 7-ilovaga muvofiq;

yagona ijtimoiy to‘lov stavkalari 8-ilovaga muvofiq;

yakka tartibdagi tadbirkorlar uchun qat'iy belgilangan soliq stavkalari 9-ilovaga muvofiq;

yer qa'ridan foydalanganlik uchun soliq, imzolanadigan bonus va tijoratbop topilma bonusi, ayrim turdagi mahsulotlar bo‘yicha qo‘shimcha foyda solig‘i stavkalari 10-13-ilovalarga muvofiq;

suv resurslaridan foydalanganlik uchun soliq, jismoniy shaxslarning mol-mulkiga solinadigan soliq, yuridik va jismoniy shaxslardan olinadigan yer solig‘i stavkalari 14-16-ilovalarga muvofiq;

kelib tushayotgan mablag‘larni O‘zbekiston Respublikasi respublika byudjyetiga o‘tkazgan holda ichki ishlar organlarida ro‘yxatdan o‘tkazishda avtotransport vositalarining egalari (foydalanuvchilari) tomonidan to‘lanadigan avtotransport vositalarini sotib olganlik va (yoki) O‘zbekiston Respublikasi hududiga vaqtinchalik olib kirganlik uchun yig‘imlar hamda xorijiy davlatlar avtotransport vositalarini O‘zbekiston Respublikasi hududiga kirishi va tranziti uchun yig‘imlar stavkalari 17-ilovaga muvofiq tasdiqlansin.

3. 2019 yilning 1 yanvaridan boshlab:

yagona soliq to‘lovi va yagona ijtimoiy to‘lovning eng kam miqdorlari;

yuk tashish bo‘yicha xizmatlar ko‘rsatuvchi yuridik shaxslar uchun, soliqqa tortish tizimidan qat'i nazar, bitta transport vositasiga hisoblaganda ular tomonidan to‘lanayotgan soliqlarning jami miqdori yakka tartibdagi tadbirkorlar ushbu faoliyat turi bo‘yicha to‘layotgan qat'iy belgilangan soliq miqdoridan kam bo‘lmasligi to‘g‘risidagi tartib bekor qilinsin.

4. Yuridik shaxslardan olinadigan foyda solig‘i yoki obodonlashtirish va ijtimoiy infratuzilmani rivojlantirish solig‘ini to‘lashdan to‘liq ozod qilish ko‘rinishidagi vaqtinchalik imtiyozlarga ega bo‘lgan yuridik shaxslar yuridik shaxslardan olinadigan foyda solig‘ini imtiyozlar amal qilish muddati tugagunga qadar ikki baravar pasaytirilgan stavkada to‘lash tartibi saqlab qolinsin.

5. O‘rnatilsinki, belgilangan stavkadan kelib chiqib hisoblangan va O‘zbekiston Respublikasi Davlat byudjyetiga to‘lanadigan jismoniy shaxslardan olinadigan daromad solig‘i summasi fuqarolarning shaxsiy jamg‘arib boriladigan pensiya hisobvaraqlariga o‘tkaziladigan har oylik majburiy badallar summasiga kamaytiriladi. Ushbu badal miqdori jismoniy shaxslardan olinadigan daromad solig‘i solinadigan daromadlaridan 0,1 foiz miqdorida hisoblab chiqariladi.

O‘zbekiston Respublikasi Davlat soliq qo‘mitasi Moliya vazirligi bilan birgalikda bir oy muddatda O‘zbekiston Respublikasi Bandlik va mehnat munosabatlari vazirligiga zarur axborotlarni taqdim etgan holda ishchi-soliq to‘lovchining hisobini yakka tartibda olib borishni nazarda tutib, jismoniy shaxslardan olinadigan daromad solig‘i va yagona ijtimoiy to‘lovning yagona soliq hisoboti shaklini belgilangan tartibda ishlab chiqsin va tasdiqlasin.

6. 2019 yil 1 yanvardan boshlab yuridik shaxslar xizmat ko‘rsatuvchi banklardan ish haqi va unga tenglashtirilgan to‘lovlar uchun pul mablag‘larini olishda (yoki plastik kartalarga o‘tkazishda) yagona ijtimoiy to‘lov hamda jismoniy shaxslardan olinadigan daromad solig‘ini to‘lash bo‘yicha to‘lov hujjatlarini taqdim etishi lozimligi nazarda tutilsin.

7. Ish beruvchi tashkilotlarga soliq yukining, shu jumladan, yagona ijtimoiy to‘lovning kamaytirilishi natijasida bo‘shaydigan mablag‘lar hisobidan xodimlar ish haqi miqdorini oshirish tavsiya etilsin.

O‘zbekiston Respublikasi Bandlik va mehnat munosabatlari vazirligi Davlat soliq qo‘mitasi bilan birgalikda mehnatga haq to‘lash fondini asossiz pasaytirish holatlarini aniqlash maqsadida xo‘jalik yurituvchi sub'yektlar faoliyati monitoringini amalga oshirsin.

Soliq to‘lovchilar 2019 yil 1 aprelga qadar xodimlar soni va (yoki) mehnatga haq to‘lash fondini ixtiyoriy ravishda hisobotlarda rasmiylashtirgan va aks ettirgan taqdirda avvalgi hisobot davrlarida xodimlar sonini yashirganlik uchun javobgarlikdan, ilgari ko‘rsatilmagan xodimlar bo‘yicha jismoniy shaxslardan olinadigan daromad solig‘i va yagona ijtimoiy to‘lovi summasini qo‘shimcha hisoblashdan ozod qilinsin.

O‘zbekiston Respublikasi Moliya vazirligi Adliya vazirligi, boshqa manfaatdor vazirliklar va idoralar bilan birgalikda 2019 yil 1 martga qadar qonun hujjatlariga ushbu qarordan kelib chiqadigan o‘zgartirish va qo‘shimchalar to‘g‘risida O‘zbekiston Respublikasi Vazirlar Mahkamasiga takliflar kiritsin, deyiladi Qarorda.

Mazkur qarorning ijrosini nazorat qilish O‘zbekiston Respublikasining Bosh vaziri A.N.Aripov, O‘zbekiston Respublikasi Prezidenti Administratsiyasi rahbari Z.Sh.Nizomiddinov, O‘zbekiston Respublikasi Prezidenti maslahatchisining birinchi o‘rinbosari B.M.Mavlonov va O‘zbekiston Respublikasi Bosh vazirining o‘rinbosari – moliya vaziri J.A.Qo‘chqorov zimmasiga yuklatildi.