OAV: AQSh ma'muriyati Tramp va Kim Chen Inning yangi uchrashuvi uchun joy izlamoqda

2018 yil oxiridan beri AQSh prezidenti Donald Tramp ma'muriyati Shimoliy Koreya yetakchisi Kim Chen In bilan uchrashuv uchun qulay joy izlamoqda. Bu haqda CNN telekanali manbalarga tayangan holda xabar berdi.

Manbalarning aytishicha, Tramp ma'muriyati joylarni o‘rganish va ular mamlakatlar yetakchilariga to‘g‘ri kelishini aniqlash maqsadida turli yerlarga bir necha jamoani yuborgan. CNN’dan qayd etishlaricha, amerikalik mulozimlar shimoliy koreyalik hamkasblariga joylar haqida aytishmagan, shuning uchun ularning ro‘yxati kelajakda kengayishi mumkin.

Telekanal ekspertlarining taxminicha, Tramp va Kim Chen In yaqin oylar ichida uchrashishi mumkin.

Eslatib o‘tamiz, avvalroq Tramp Kim Chen In bilan yangi uchrashuvni kutayotganini ma'lum qilgandi.

«Men ham KXDR Davlat kengashi raisi Kim Chen In bilan uchrashuvni intiqlik bilan kutyapman. U Shimoliy Koreya ulkan iqtisodiy salohiyatga ega ekanligini juda yaxshi tushunadi», - deya ma'lum qildi Tramp KXDR yetakchisi AQSh prezidenti bilan uchrashishga tayyor ekani haqidagi xabarlarga izoh berib.