Tashqi ishlar vazirligi qoshida yangi byuro tuziladi

Normativ-huquqiy hujjatlar loyihalari muhokamasi portalida “O‘zbekiston Respublikasida akkreditatsiyadan o‘tgan diplomatik vakolatxonalar, konsullik muassasalari va ularga tenglashtirilgan tashkilotlarga xizmat ko‘rsatishni tubdan yaxshilash to‘g‘risida”gi hujjat loyihasi joylashtirildi.

Hujjat bilan O‘zbekiston Respublikasi Tashqi ishlar vazirligi «Diplomatik vakolatxonalarga xizmat ko‘rsatish boshqarmasi», «Ko‘chmas mulk bilan ishlash direksiyasi» va «Ambassador» davlat unitar korxonalarini qo‘shish yo‘li bilan ularning negizida O‘zbekiston Respublikasi Tashqi ishlar vazirligi qoshidagi «Diplomatik korpusga xizmat ko‘rsatish byurosi» davlat unitar korxonasi tuzilishi va diplomatik vakolatxonalarga xizmat ko‘rsatish bo‘yicha yagona buyurtmachi qilib belgilanishi mumkin.

Byuro ta'sischisi etib O‘zbekiston Respublikasi Tashqi ishlar vazirligi belgilanadi.

Byuro O‘zbekiston Respublikasi Tashqi ishlar vazirligi «Diplomatik vakolatxonalarga xizmat ko‘rsatish boshqarmasi», «Ko‘chmas mulk bilan ishlash direksiyasi» va «Ambassador» davlat unitar korxonalarining barcha huquq, majburiyat va shartnomalari bo‘yicha huquqiy vorisi etib tayinlanadi.

Byuroning asosiy vazifalari etib quyidagilar belgilanadi:

O‘zbekiston Respublikasida diplomatik vakolatxonalarning faoliyat olib borishlari uchun zarur shart-sharoitlar yaratish, ularga kompleks servis xizmatlar ko‘rsatish, diplomatik vakolatxonalarning tegishli ravishda ishlashini ta'minlashga qaratilgan masalalarni hal qilish va chora-tadbirlarni amalga oshirish;

O‘zbekiston Respublikasining xalqaro majburiyatlarda nazarda tutilgan diplomatik vakolatxonalarga xizmat ko‘rsatish va ularni joylashtirish bo‘yicha tadbirlarni amalga oshirish;

O‘zbekiston Respublikasi hududidagi chet el diplomatik vakolatxonalari va O‘zbekiston Respublikasining xorijdagi diplomatik vakolatxonalari va konsullik muassasalari uchun mo‘ljallangan obekt va uy-joylarni qurish va rekonstruksiya qilish;

diplomatik vakolatxonalar va ularning xodimlariga bino, xonalarni ijaraga berish, ko‘chmas mulkning ijara va oldi-sotdi shartnomalarini rasmiylashtirishda ko‘mak berish (vositachilik qilish), shuningdek, ushbu bino va xonalarning ekspluatatsiyasini ta'minlash;

o‘z vazifalariga taalluqli masalalar bo‘yicha diplomatik vakolatxonalarning manfaatlarini O‘zbekiston Respublikasining davlat hokimiyati va boshqaruvi organlarida, korxona va muassasalarida ifoda etish, shuningdek, diplomatik vakolatxonalarga xizmat ko‘rsatuvchi tashkilot va korxonalar faoliyatini muvofiqlashtirish hamda diplomatik vakolatxonalarda ishlaydigan O‘zbekiston Respublikasi fuqarolarining mehnat huquqlarini himoya qilish;

O‘zbekiston Respublikasi Tashqi ishlar vazirligiga unga yuklatilgan vazifalarni bajarishda, shu jumladan, xorijiy investitsiyalar va ilg‘or texnologiyalarni jalb qilish, milliy tovar va xizmatlarni olg‘a surish, mamlakatga turistlar oqimini ko‘paytirish, protokol tadbirlarini o‘tkazish, xorijiy delegatsiyalarni kutib olish-kuzatish, chet elga xizmat safariga chiqayotgan xodimlarga aviachiptalar xarid qilish, avtotransport xizmatlarini ko‘rsatish va boshqalar bo‘yicha ko‘mak berish;

bo‘sh vaqt va dam olishni tashkillashtirish, turizm, jismoniy tarbiya va sport sohasida xizmatlar taqdim etish.

Byuro orqali quyidagilar amalga oshirilishi belgilanadi:

diplomatik vakolatxonalar (jumladan, xalqaro hukumatlararo va nohukumat tashkilotlar)ning, xorijiy davlatlarning hukumat va nohukumat tashkilotlari, ularning vakolatxona va filiallarining; muxbirlar, muxbirlik punktlari (byuro, ofislari)ning; savdo vakolatxonalarining; xorijiy bank va tijorat tashkilotlari, shuningdek, doimiy muassasalarning avtotransport vositalarini ro‘yxatga (qayta ro‘yxatga) quyish, ro‘yxatdan chiqarish, texnik ko‘rikdan o‘tkazish, haydovchilik guvohnomalarining ekvivalentlarini berish (almashtirish) va davlat raqami belgilarini berish;

bojxona hujjatlarini rasmiylashtirish, diplomatik vakolatxonalar nomiga kelib tushayotgan yuklarni deklaratsiyalash, bojxonada qayta ishlash;

diplomatik vakolatxonalarning radioelektron aloqa vositalari va radiouzatuvchi qurilmalarni sotib olish, o‘rnatish, olib kirish va ekspluatatsiya qilishi uchun zarur hujjatlarni rasmiylashtirish;

diplomatik vakolatxonalar mehmonlarini ro‘yxatga qo‘yish, kirish vizalari va viza talabnomasini, diplomatik vakolatxonalarda ishlovchi O‘zbekiston Respublikasi fuqarolarining chet elga chiqishlari uchun hujjatlarni rasmiylashtirish;

O‘zbekiston Respublikasi fuqarolarining diplomatik vakolatxonalarga ishga joylashishlarini rasmiylashtirishda, ularning mehnat stajini hisobini yuritishda, ishga qabul qilish yoki bo‘shatish to‘g‘risida tegishli buyruqlarni chiqarishda ko‘maklashish.