DXX Farg‘onada 3,5 mln dollarni Qirg‘izistonga olib chiqib ketayotgan shaxslarni ushladi

Davlat xavfsizlik xizmati Farg‘ona viloyat boshqarmasi xodimlari tomonidan o‘tkazilgan tezkor tadbir davomida Farg‘ona - Yuqori Vodil yo‘nalishi bo‘yicha harakatlanayotgan “Neksiya” avtomobili Vodil yo‘lining “Novket” MFY hududida to‘xtatildi.

“O‘zbekiston 24” telekanalida efirga uzatilgan lavhada aytilishicha, mashina ko‘zdan kechirilganda, uning isitish moslamasi ichida 23 ta o‘ramda AQSh dollari borligi aniqlangan. 

Ma'lum bo‘lishicha, ushbu pullar mazkur mashinada ketayotgan A.M.ga tegishli bo‘lgan. “Neksiya” avtomashinasi egasi, Vodil qishlog‘ida yashovchi A.D.ning aytishicha, u 50 dollar evaziga A.M.ni Qo‘qon shahriga olib borib, ushbu valutalarni olib kelgan.

Tezkor surishtiruv davomida A.D.ning yashash xonadonidan ham 24 ta o‘ramda bo‘lgan AQSh dollarlari olindi. Shuningdek, A.M. ushbu valutalarni Qo‘qon shahrida O‘.X.dan olganligi aniqlandi va u ham ushlandi.

Lavhada aytilishicha, noqonuniy pullarning umumiy miqdori 1 mln 763 ming dollarni tashkil qilgan. 

Yana bir holat. Qirg‘izistonda tug‘ilib o‘sgan va hozirda Farg‘ona viloyati Farg‘ona tumanida istiqomat qiluvchi 56 yoshli A.Yo.ning avtomashinasi ham ko‘zdan kechirilganda, 35 dona o‘ram topildi. Ular ochib tekshirilganda 1 mln 771 ming 650 AQSh dollari borligi ma'lum bo‘ldi.

Aniqlanishicha, Buvayda tumanida yashovchi N.J. ushbu pullarni Toshkentdan Farg‘onaga keltirib bergan. A.Yo. esa ularni noqonuniy yo‘llar orqali Qirg‘iziston Respublikasiga o‘tkazib berishi kerak bo‘lgan. 

O‘tkazilgan tezkor tadbirlar davomida qonunbuzarlardan jami 3 mln 534 ming 650 AQSh dollari ashyoviy dalil sifatida rasmiylashtirib olindi. Hozirda mazkur holatlar yuzasidan DXX Farg‘ona viloyati boshqarmasi tomonidan JKning tegishli moddalariga asosan jinoyat ishlari qo‘zg‘atilib, tergov harakatlari olib borilmoqda. Ushbu pullarning haqiqiy egalarini aniqlash bo‘yicha ham zarur choralar ko‘rilyapti.