Chet el fuqarolari va fuqaroligi bo‘lmagan shaxslarni Toshkentda propiska qilish to‘g‘risidagi yo‘riqnomaga qo‘shimchalar kiritiladi

Normativ-huquqiy hujjatlar loyihalari muhokamasi portalida “Chet el fuqarolari hamda fuqaroligi bo‘lmagan shaxslarni Toshkent shahri va Toshkent viloyatida doimiy va vaqtincha propiska qilish tartibi to‘g‘risidagi yo‘riqnomaga o‘zgartirish va qo‘shimchalar kiritish haqida”gi hujjat loyihasi joylashtirildi.

Chet el fuqarolari hamda fuqaroligi bo‘lmagan shaxslarni Toshkent shahri va Toshkent viloyatida doimiy va vaqtincha propiska qilish tartibi to‘g‘risidagi yo‘riqnomaga kiritilishi mumkin bo‘lgan o‘zgartirish va qo‘shimchalar:

Quyidagi mazmundagi 2-1-band bilan to‘ldiriladi:

“2-1.Chet el fuqarolari hamda fuqaroligi bo‘lmagan shaxslarni Toshkent shahrida va Toshkent viloyatida doimiy va vaqtincha propiska qilish to‘g‘risidagi Nizom bilan tasdiqlangan “Toshkent shahri va Toshkent viloyatida doimiy propiska qilinish huquqiga ega bo‘lgan shaxslar – chet el fuqarolari va fuqaroligi bo‘lmagan shaxslar toifalari Ro‘yxati”ga asosan Toshkent shahri va Toshkent viloyatida doimiy propiska qilish to‘g‘risida iltimos qilish huquqiga egadirlar.

Ro‘yxatda nazarda tutilmagan chet el fuqarolari va fuqaroligi bo‘lmagan shaxslar toifasi Toshkent shahrida va Toshkent viloyatida doimiy propiska qilinmaydi.”.

3-band quyidagi tahrirda bayon etiladi:

“3. Xorijiy davlatlardan kelgan, Toshkent shahri va Toshkent viloyatida kamida bir yil yashagan chet el fuqarolari va fuqaroligi bo‘lmagan shaxslar Toshkent shahri va Toshkent viloyatida doimiy yashashga ruxsat olish uchun tuman (shahar) ichki ishlar boshqarmasi (bo‘limi)ning (TShIIB) migratsiya va fuqarolikni rasmiylashtirish bo‘limiga (MvaFRB) murojaat etishi mumkin. Buning uchun ular TShIIB M va FRBga quyidagi hujjatlarni taqdim etadi:

muvofiq shaklda ikki nusxada ariza-anketa;

chet el fuqarosining pasporti yoki fuqaroligi bo‘lmagan shaxsning harakatlanish hujjati;

uy-joy mulkdori (mulkdorlari)ning turar joy maydoni berish to‘g‘risidagi arizasi (roziligi) yoxud notarial tasdiqlangan arizasi (roziligi), agar shaxsan o‘zi berish imkoni mavjud bo‘lmasa;

uy-joy uchun hujjatlarning nusxalari;

nikoh tuzilganlik, tug‘ilganlik, ota-onalar vafot etganligi to‘g‘risidagi guvohnomalarning, shuningdek vasiylik yoki homiylikni tasdiqlaydigan hujjatlar (nusxalari olinib, asli qaytariladi);

tegishli davlat hokimiyati organi, davlat yoki xo‘jalik boshqaruvi organi, respublika ahamiyatiga molik boshqa davlat tashkiloti rahbarining iltimosnomasi. (Ro‘yxatning 6-bandi bo‘yicha doimiy propiska qilishda);

xorijiy davlatlar huquqni muhofaza qilish organlari tomonidan yoki xorijiy davlatning O‘zbekiston Respublikasidagi elchixonasi, konsullik muassasasi tomonidan berilgan, avvalgi yashash joyi bo‘yicha sudlanmaganligi to‘g‘risida ma'lumotnoma (Mustaqil Davlatlar Hamdo‘stligiga a'zo davlatlardan kelgan xorijiy fuqarolar va fuqaroligi bo‘lmagan shaxslar uchun);

35 x 45 mm o‘lchamli ikkita fotosurat;

hujjatlarning ko‘rib chiqilganligi va rasmiylashtirilganligi uchun yig‘im to‘langanligi to‘g‘risidagi kvitansiya.”.

5 va 6-bandlar quyidagi tahrirda bayon etiladi:

“5. TShIIB M va FRB hujjatlar qabul qilingandan so‘ng ikki hafta muddatda ularni rasmiylashtiradi, arizachining vaqtincha yashash joyi bo‘yicha tekshirish o‘tkazadi, uning natijasi bo‘yicha fuqarolarning o‘zini-o‘zi boshqarish organi tomonidan chet el fuqarosining yoki fuqaroligi bo‘lmagan shaxsning vaqtincha propiska qilingan joyi bo‘yicha yashashi to‘g‘risida, fuqarolarning o‘zini o‘zi boshqarish organi raisi, mahalla faollari, profilaktika inspektori, shaxs yashagan uy egasi tomonidan imzolanadigan dalolatnoma tuziladi. Shuningdek, O‘zbekiston Respublikasi Ichki ishlar vazirligi Tezkor ma'lumotlar boshqarmasi va tegishliligi bo‘yicha Toshkent shahar Ichki ishlar bosh boshqarmasining va Toshkent viloyati Ichki ishlar boshqarmasining Manzil ma'lumotnoma byurosidan ariza beruvchi va turar joy egasiga doir tegishli ma'lumotlar so‘rab olinadi.

TShIIB MvaFRB tomonidan barcha hujjatlar olingach, chet el fuqarosi yoki fuqaroligi bo‘lmagan shaxsga nisbatan shaxsiy yig‘ma ish jildi ochiladi hamda to‘plangan hujjatlar bo‘yicha ma'lumotnoma tayyorlanib shaxsiy yig‘ma ish jildi bilan birga Toshkent shahar IIBBning Migratsiya va fuqarolikni rasmiylashtirish boshqarmasiga yoki Toshkent viloyati Ichki ishlar boshqarmasining Migratsiya va fuqarolikni rasmiylashtirish boshqarmasiga yuboriladi.

Toshkent shahar IIBB MvaFRB yoki Toshkent viloyati IIB M va FRB tomonidan uch ish kuni mobaynida taqdim etilgan hujjatlarni tekshiradi va materiallarni tegishli vakolatli organga yuboradi”.

“6. Tegishli vakolatli organning ijobiy javobi olingan taqdirda IIBB M va FRB va IIB MvaFRB tomonidan o‘n kunlik muddatda IIBB yoki IIB boshlig‘i o‘rinbosari tomonidan tasdiqlanadigan xulosa tayyorlanadi va materiallar IIV Migratsiya va fuqarolikni rasmiylashtirish bosh boshqarmasiga yakuniy xulosa chiqarish uchun yuboriladi.

IIV MvaFRBB ushbu masalani hal etishda tegishli vakolatli organning fikr-mulohazasini, zaruriyat bo‘lganda esa – O‘zbekiston Respublikasi Tashqi ishlar vazirligining xulosasini so‘rab oladi va bir oy muddat mobaynida IIV o‘rinbosari tomonidan tasdiqlanadigan xulosa chiqaradi. Xulosa chet el fuqarosi yoki fuqaroligi bo‘lmagan shaxsning shaxsiy yig‘ma ish jildiga biriktirilgan holda tegishliligi bo‘yicha IIBB M va FRB yoki IIB M va FRBga ijro uchun yuboriladi”.

10-band birinchi xatboshi quyidagi tahrirda bayon etiladi:

“10. “O‘zbekiston Respublikasining fuqaroligi to‘g‘risida”gi O‘zbekiston Respublikasi Qonuni (1992 yil 28 iyul) kuchga kirgandan keyin O‘zbekiston Respublikasiga kelgan va sobiq SSSR namunasidagi pasportlarga ega bo‘lgan yoki ularni yo‘qotgan, shuningdek hujjatlarga ega bo‘lmagan (tug‘ilganlik to‘g‘risidagi guvohnoma bundan mustasno) va ushbu Nizomga ilovada ko‘rsatilgan Ro‘yxatga kiruvchi uzoq vaqt Toshkent shahrida yoki Toshkent viloyatida yashayotgan shaxslar shaxsni tasdiqlovchi hujjat olish masalasi bo‘yicha tegishli TShIIB M va FRBga murojaat qilib, quyidagi hujjatlarni taqdim etadi;”.

11-band quyidagi mazmundagi beshinchi xatboshi bilan to‘ldiriladi:

“Ro‘yxatga kirmaydigan, Yo‘riqnomaning10-bandida ko‘rsatib o‘tilgan shaxslar, tegishli hujjatlar (fuqaroligi yo‘q shaxs uchun yashash guvohnomasi yoki fuqaroligi yo‘q shaxs uchun harakatlanish hujjati) bilan hujjatlashtirilib, poytaxt mintaqasi yoki respublika hududidan tashqariga chiqarib yuboriladi, ushbu to‘g‘risida ulardan mazkur Yo‘riqnomaning 5-ilovasiga muvofiq majburiyatnoma olinadi”.

16 va 17-bandlar quyidagi tahrirda bayon etiladi:

“16. Respublikaning boshqa mintaqalaridan Toshkent shahri va Toshkent viloyatiga kelgan hamda yashash guvohnomasiga ega bo‘lgan chet el fuqarolari va fuqaroligi bo‘lmagan shaxslar doimiy propiskani rasmiylashtirish uchun TShIIB M va FRBga quyidagi hujjatlarni taqdim etadi:

mazkur Yo‘riqnomaning 6-ilovasiga muvofiq shaklda ikki nusxada ariza-anketa;

yashash guvohnomasi;

uy-joy mulkdori (mulkdorlari)ning turar joy maydoni berish to‘g‘risidagi arizasi (roziligi) yoxud notarial tasdiqlangan arizasi (roziligi), agar shaxsan o‘zi berish imkoni mavjud bo‘lmasa;

uy-joy uchun hujjatlarning nusxalari;

nikoh tuzilganlik, tug‘ilganlik, ota-onalar vafot etganligi to‘g‘risidagi guvohnomalarning, shuningdek, vasiylik yoki homiylikni tasdiqlaydigan hujjatlar (nusxalari olinib, asli qaytariladi);

tegishli davlat hokimiyati organi, davlat yoki xo‘jalik boshqaruvi organi, respublika ahamiyatiga molik boshqa davlat tashkiloti rahbarining iltimosnomasi (ro‘yxatning 6-bandi bo‘yicha doimiy propiska qilishda);

propiska qilinganlik uchun davlat boji to‘langanligi to‘g‘risidagi kvitansiya”.

Quyidagi mazmundagi 17-1 va 17-2-bandlar bilan to‘ldiriladi:

“17-1. IIBB M va FRB yoki IIB M va FRB doimiy propiska masalasi bo‘yicha ijobiy qarorga doir materiallar uch kunda doimiy propiskani rasmiylashtirish uchun tegishli TShIIB M va FRBga yuboradi.

17-2. Toshkent shahar IIBB yoki Toshkent viloyati IIBning ijobiy qarori Toshkent shahri va Toshkent viloyatiga respublikaning boshqa mintaqalaridan kelgan, yashash guvohnomasiga ega bo‘lgan chet el fuqarolariga va fuqaroligi bo‘lmagan shaxslarni Toshkent shahri va Toshkent viloyatida doimiy propiskani rasmiylashtirish uchun asos hisoblanadi.

Yashash guvohnomasiga ega bo‘lgan hamda respublikaning boshqa mintaqalaridan Toshkent shahri va Toshkent viloyatiga kelgan, chet el fuqarolarini va fuqaroligi bo‘lmagan shaxslarni Toshkent shahri va Toshkent viloyatiga doimiy propiska qilishni rad etish to‘g‘risidagi qaror TShIIB MvaFRB yoki IIB MvaFRB tomonidan qabul qilinishi mumkin.”.

18–22-bandlar quyidagi tahrirda bayon etiladi:

“18. Yashash guvohnomasiga ega bo‘lgan hamda respublikaning boshqa mintaqalaridan Toshkent shahri va Toshkent viloyatiga kelgan chet el fuqarolariga va fuqaroligi bo‘lmagan shaxslarga Toshkent shahri va Toshkent viloyatida doimiy propiska qilish rad etilgan taqdirda hujjatlar uch ish kuni mobaynida TShIIB MvaFRBga qaytariladi, u bir sutka mobaynida ushbu qarorni arizachiga yetkazadi. Arizachi rad javobi berilganligi haqidagi xabarni olgandan so‘ng qolish uchun asoslar mavjud bo‘lmagan taqdirda uch sutka mobaynida Toshkent shahri yoki Toshkent viloyati hududini tark etishi shart.

Quyidagilar yuqorida ko‘rsatilgan toifadagi shaxslar Toshkent shahri yoki Toshkent viloyatida keyinchalik vaqtincha bo‘lishlari uchun asos hisoblanadi:

qonun hujjatlariga muvofiq sotib olingan turar joy mavjud bo‘lganda;

yaqin qarindoshlar (er, (xotin), ota-ona, farzandlar) mavjud bo‘lganda;

vasiylar (homiylar) mavjud bo‘lganda;

mehnat faoliyati bilan shug‘ullanganda, ta'lim muassasalarida o‘qiganda;

davolash muassasalarida davolanayotganda.

Toshkent shahrida uy-joyning oldi-sotdi bitimlarini, almashish, renta, umrbod ta'minlash sharti bilan o‘zgaga berish va hadya qilishni notarial tasdiqlash va davlat ro‘yxatidan o‘tkazish, shuningdek Toshkent shahridagi turar joy yoxud turar joy bo‘lmagan bino shaklidagi ko‘chmas mulkni (ko‘chmas mulkning bir qismini) garovga (ipotekaga) qo‘yish, voz kechish va o‘zgaga berishning boshqa usullari quyidagi hollarda amalga oshiriladi, agar sotib oluvchi tomon chet el fuqarosi va fuqaroligi bo‘lmagan shaxs:

Toshkent shahrida doimiy propiskaga ega bo‘lsa;

Toshkent shahri hududida kamida uch yil doimiy yashab turgan (lavozimda bo‘lgan) va Ro‘yxatning 2, 3 va 6-bandlariga muvofiq Toshkent shahrida doimiy propiska qilingan chet el fuqarosi yoki fuqaroligi bo‘lmagan shaxs hisoblansa va doimiy propiskasi borligi to‘g‘risida ichki ishlar organining ma'lumotnomasini taqdim etsa.

Toshkent viloyatida uy-joyning oldi-sotdi bitimlarini, almashish, renta, umrbod ta'minlash sharti bilan o‘zgaga berish va hadya qilishni notarial tasdiqlash va davlat ro‘yxatidan o‘tkazish, shuningdek Toshkent shahridagi turar joy yoxud turar joy bo‘lmagan bino shaklidagi ko‘chmas mulkni (ko‘chmas mulkning bir qismini) garovga (ipotekaga) qo‘yish, voz kechish va o‘zgaga berishning boshqa usullari quyidagi hollarda amalga oshiriladi, agar sotib oluvchi tomon chet el fuqarosi va fuqaroligi bo‘lmagan shaxs:

Toshkent shahri yoki Toshkent viloyatida doimiy propiskaga ega bo‘lsa;

Toshkent shahri yoki Toshkent viloyati hududida kamida uch yil doimiy yashab turgan (lavozimda bo‘lgan) va Ro‘yxatning 2, 3 va 6-bandlariga muvofiq Toshkent shahrida doimiy propiska qilingan chet el fuqarosi yoki fuqaroligi bo‘lmagan shaxs va ichki ishlar organining doimiy propiskasi borligi to‘g‘risidagi ma'lumotnomasini taqdim etsa.

Toshkent shahrida doimiy propiska qilingan va yashash guvohnomasiga ega bo‘lgan chet el fuqarolari va fuqaroligi bo‘lmagan shaxslar Toshkent shahri va Toshkent viloyatida boshqa manzilga doimiy propiskaga o‘tish masalasida murojaat qilgan taqdirda, hujjatlar TShIIB MvaFRBda vakolatli organlar bilan kelishilmasdan ko‘rib chiqiladi.

Ko‘chmas mol-mulklarni oldi-sotdi bitimlarini notarial tasdiqlash va davlat ro‘yxatidan o‘tkazish:

Toshkent shahri va Toshkent viloyatiga respublikaning boshqa mintaqalaridan kelgan va o‘sha mintaqalarda doimiy propiskaga ega bo‘lgan chet el fuqarolari va fuqaroligi bo‘lmagan shaxslar tomonidan Toshkent shahri va Toshkent viloyatida qiymati eng kam oylik ish haqining 2500 baravaridan kam bo‘lmagan yangi qurilgan ko‘chmas mol-mulkni hisob-kitobni bank hisobvaraqlari orqali amalga oshirgan holda sotib olganda;

Toshkent shahri va Toshkent viloyatiga boshqa davlatlardan kelgan va yashash guvohnomasiga ega bo‘lgan chet el fuqarolari va fuqaroligi bo‘lmagan shaxslar tomonidan Toshkent shahri va Toshkent viloyatida qiymati 600 mln. so‘mdan kam bo‘lmagan yangi qurilgan ko‘chmas mol-mulkni hisob-kitobni bank hisobvaraqlari orqali amalga oshirib sotib olganda ham amalga oshiriladi.

Ushbu Yo‘riqnoma maqsadlari uchun yangi qurilgan ko‘chmas mol-mulk deganda mulk huquqi tuman (shahar) hokimining qurilishi tugallangan binoni va inshootni foydalanishga qabul qilish to‘g‘risidagi komissiya dalolatnomasini tasdiqlash haqidagi qarori asosida vujudga kelgan va uni qabul qilingan paytdan e'tiboran uch yil o‘tmagan mol-mulk tushuniladi.

31-bandda:

oltinchi xatboshidan “notarial tasdiqlangan” degan so‘zlar chiqarib tashlanadi;

yettinchi xatboshi quyidagi tahrirda bayon etiladi:

“uy-joy mulkdori (mulkdorlari)ning turar joy maydoni berish to‘g‘risidagi arizasi (roziligi) yoxud notarial tasdiqlangan arizasi (roziligi), agar shaxsan o‘zi berish imkoni mavjud bo‘lmasa;”.

34-bandda:

beshinchi xatboshidan “notarial tasdiqlangan” degan so‘zlar chiqarib tashlanadi;

oltinchi yettinchi xatboshi quyidagi tahrirda bayon etiladi:

“uy-joy mulkdori (mulkdorlari)ning turar joy maydoni berish to‘g‘risidagi arizasi (roziligi) yoxud notarial tasdiqlangan arizasi (roziligi), agar shaxsan o‘zi berish imkoni mavjud bo‘lmasa;”.

50-band quyidagi tahrirda bayon etiladi:

“50. Vaqtincha propiskani takroriy rasmiylashtirish masalasini ko‘rib chiqish TShIIB MvaFRB tomonidan amalga oshiriladi. Buning uchun chet el fuqarolari va fuqaroligi bo‘lmagan shaxslar vaqtincha propiska muddati tamom bo‘lishidan o‘n besh kun oldin TShIIB MvaFRBga quyidagi hujjatlarni taqdim etadi:

mazkur Yo‘riqnomaning 8-ilovasiga muvofiq shaklda ariza;

yashash guvohnomasi yoki fuqaroligi bo‘lmagan shaxsning harakatlanish hujjati;

tug‘ilganlik to‘g‘risidagi guvohnoma – 16 yoshga to‘lmagan shaxslar uchun;

uy-joy uchun hujjatlarning nusxalari;

uy-joy mulkdori (mulkdorlari)ning turar joy maydoni berish to‘g‘risidagi arizasi (roziligi) yoxud notarial tasdiqlangan arizasi (roziligi), agar shaxsan o‘zi berish imkoni mavjud bo‘lmasa;

vaqtincha propiskani takroran rasmiylashtirish zarurligini tasdiqlovchi hujjat;

propiska qilinganlik uchun davlat boji to‘langanligi to‘g‘risidagi kvitansiya.

Ariza ro‘yxatdan o‘tkazilgandan, shuningdek hujjatlar belgilangan tartibda o‘rganib chiqilgandan va rasmiylashtirilgandan keyin TShIIB MvaFRB bir sutka mobaynida chet el fuqarosiga va fuqaroligi bo‘lmagan shaxsga vaqtinchalik propiskani rasmiylashtiradi.”.

Eslatib o‘tamiz, avvalroq Toshkentda doimiy propiska qilish tartibida o‘zgarishlar yuz berishi mumkin ekani xabar qilingandi.