Kolumbiyada narkobaron Eskobarning uyi buzib tashlandi

22 fevralda Kolumbiyaning Medelin shahrida 1993 yilda politsiya bilan otishmada o‘ldirilgan narkobaron Pablo Eskobar o‘z oilasi bilan yashagan, “Monako” nomi bilan ma'lum bo‘lgan uy buzib tashlandi.  

8 qavatli uy nazorat qilinuvchi portlatish yordamida buzib tashlangan. Uy o‘rnida narkomafiya qurbonlari xotirasiga yodgorlik majmuasi barpo etishga va'da qilingan. Bino shahar g‘arbidagi El-Poblado deb nomlangan nufuzli tumanda joylashgan bo‘lgan. Eskobar bu uyni 1988 yilda unga suiqasd uyushtirilgandan keyin tark etgan.

2018 yil sentyabrda shahar ma'muriyati Eskobarga bag‘ishlangan uy-muzeyni yopishga qaror qilgandi. Muzey Eskobarning akasi tomonidan boshqarilgan.

Pablo Eskobar XX asrning eng ashaddiy jinoyatchilaridan biri sifatida tarixga kirgan. Eskobar haqidagi ko‘plab kitoblar, Medelindagi u bilan bog‘liq sayyohlik turlari sababli shaharning ba'zi odamlari narkobaronning hayoti qahramonlashtirilishi va afsonaga aylantirilishidan xavotir bildirishgan.   

O‘tgan hafta Eskobar ermak uchun ko‘p yillar avval o‘z yer mulkida boqqan 3 tonnalik begemotlar ko‘payib ketgani va katta hudud bo‘ylab tarqalib ketgani ma'lum qilingan. Ekologlar ushbu jonzotlarni mahaliy aholi va tabiat uchun xavfli deb hisoblashmoqda. O‘tgan yillar davomida ularning soni 4 tadan 50 tagacha ko‘paygan.

Eskobarning hayvonat bog‘ida begemotlardan tashqari, karkidon, fil va jirafalar kabi yuzlab ekzotik hayvonlar saqlangan.