O‘zbekistonda tez tibbiy yordam mashinalari uchun qo‘shimcha yo‘l ajratish taklif etildi

“Mening fikrim” jamoaviy murojaatlar portalida tez tibbiy yordam mashinalari harakati uchun qo‘shimcha yo‘l ajratish haqida petitsiya paydo bo‘ldi.

Bildirilishicha, mamlakat aholisi soni, mutanosib ravishda avtomobillar soni ham ortib bormoqda. Bu esa shaharlardagi ayrim yo‘llarda tez-tez tirbandlikni vujudga keltirib chiqaradi. Ayniqsa, qatnov ko‘p bo‘ladigan chorraha, ko‘chalar kesishmasi, o‘tkazish punktlarida tirbandlik bir necha yuz metrdan oshib, shoshilinch harakatlanayotgan tez tibbiy yordam mashinalariga to‘sqinlik qiladi. 

“Shu tufayli tez tibbiy yordam mashinalari foydalanishi uchun alohida yo‘l ajratishni taklif qilaman. Sababi tez tibbiy yordam mashinasi olib ketayotgan bemor uchun har bir daqiqa muhim hisoblanadi. Jahon tajribasiga murojaat qilsak Yaponiya va Kanada kabi davlatlarda tez tibbiy yordam mashinalari uchun alohida yo‘l tizimi tashkil etilgan. Biz uchun butun boshli yo‘l emas, faqat zarur bo‘lgan joylarda qo‘shimcha o‘tish yo‘lagi tashkil etilsa, yetarli”, - deb yozadi petitsiya muallifi.

Qayd etilishicha, g‘oyani amalga oshirish uchun avtomobil qatnovi ko‘p bo‘lgan asosiy yo‘llardagi chorrahalarda ma'lum uzunlikdagi (150-200 m) qo‘shimcha yo‘llar tashkil qilinishi talab etiladi. 

U yo‘ldan faqat tez tibbiy yordam mashinalari (yoki favqulodda harakatlanuvchi mashinalar)ning harakatlanishiga ruxsat etiladi. Bu yo‘l orqali har qanday tirbandlikdan osongina o‘tib ketish imkoni paydo bo‘ladi, deyiladi murojaatda.

Eslatib o‘tamiz, avvalroq respublika bolalar autizmi reabilitatsiya markazini tashkil etish haqida petitsiya paydo bo‘lgandi.