Notarial harakatlarni masofadan turib amalga oshirish taklif etildi

 “Mening fikrim” jamoaviy murojaatlar portalida notarial harakatlarni masofadan turib amalga oshirish haqida petitsiya paydo bo‘ldi.

Qayd etilishicha, hozirda notariuslar faoliyatini tartibga solish, sohada shaffoflikni ta'minlash, zamonaviy axborot-kommunikatsiya texnologiyalarini keng joriy etish borasida keng ko‘lamli islohotlar amalga oshirilmoqda. 

“Mana shu islohotlarning mantiqiy davomi sifatida notarial harakatlarni masofadan turib amalga oshirish tartibini joriy etish maqsadga muvofiq bo‘ladi”, - deb yozadi petitsiya muallifi. 

Bildirilishicha, bugungi kunda ko‘plab yurtdoshlarimiz xizmat, o‘qish, ish yoki turizm maqsadlarida xorijiy mamlakatlarga safarlarni amalga oshirishmoqda. Mana shunday vaqtlarda notarial harakatlarni amalga oshirish zarurati yuzaga kelib qoladi. Ayniqsa, tadbirkorlik sub'yektlari faoliyatida bu ko‘p kuzatiladi.

“Shu sababli xorijiy davlatlarning ilg‘or tajribalari asosida yurtimizda ham notarial harakatlarni onlayn amalga oshirish tartibi joriy etilishini taklif qilaman”, - deyiladi murojaatda.

Eslatib o‘tamiz, avvalroq O‘zbekistonda tez tibbiy yordam mashinalari uchun qo‘shimcha yo‘l ajratish taklif etilgandi.