25 fevral kuni O‘zbekiston inson huquqlari «Ezgulik» jamiyati raisi Abdurahmon Tashanov «Jasliq»qa borib mahkum Iskandar Xudoyberganov bilan uchrashdi. U Kun.uz muxbiri bilan suhbatda uchrashuv tafsilotlari haqida aytib berdi.
«Iskandar Xudoyberganov bilan uchrashish uchun bildirilgan murojaat paysalga solinmay, o‘z vaqtida ko‘rib chiqildi. Men uchrashuvni belgilashda qiyinchiliklarga duch kelmadim. Xudoyberganov bilan suhbatimiz taxminan 40 daqiqa davom etdi», – deydi inson huquqlari faoli.
1974 yilda Toshkent shahrida tug‘ilgan Iskandar Xudoyberganov 2002 yil 28 noyabr kuni Toshkent shahar sudi tomonidan Jinoyat kodeksining 155-moddasi 3-qismi («Terrorizm»), 156-moddasi 2-qismi («Milliy, irqiy, etnik yoki diniy adovat qo‘zg‘atish»), 159-moddasi 4-qismi («O‘zbekiston Respublikasi Konstitutsiyaviy tuzumiga tajovuz qilish»), 161-moddasi («Qo‘poruvchilik»), 242-moddasi 2-qismi («Jinoiy uyushma tashkil etish»), 247-moddasi 3-qismi («O‘qotar qurol, o‘q-dorilar, portlovchi moddalar yoki portlatish qurilmalarini qonunga xilof ravishda egallash»), 248-moddasi 1-qismi («Qurol, o‘q-dorilar, portlovchi moddalar yoki portlatish qurilmalariga qonunga xilof ravishda egalik qilish»)da ko‘zda tutilgan jinoyatlarni sodir etishda ayblanib o‘lim jazosiga hukm qilingan, keyinroq O‘zbekiston Respublikasi Oliy sudi ajrimiga asosan hukm o‘zgartirilib, 25 yil muddatga ozodlikdan mahrum etilgan.
Xudoyberganov belgilangan jazoni O‘zbekiston Ichki ishlar vazirligi Jazoni ijro etish Bosh boshqarmasi tizimidagi 64/71-sonli («Jasliq») muassasasida o‘tamoqda.
Abdurahmon Tashanovning aytishicha, mahkumga nisbatan qiynoqlar ishlatilayotgani, uning sog‘lig‘i og‘irlashib, yashash sharoiti qiyinlashgani kabi asossiz tarqatilgan xabarlar uchrashuvda o‘z tasdig‘ini topmadi.
«Xudoyberganov so‘nggi ikki yilda umuman qiynoqlar qo‘llanilmayotgani, unga nisbatan kuch yoki bosim ishlatilmaganini bildirdi. Men uning so‘zlariga shunchaki ishonmadim, barcha tafsilotlarni birma-bir so‘radim. Mening nazarimda, u haqiqatan ishonchli gapirdi. Ovqatlanish ratsionini tasvirlab berishini so‘ragandim, aldamay, rostini aytdi. Masalan, uchrashuvga qadar sho‘r bodring, pishirilgan lavlagidan salat, grechka, tuxum va perlovkadan pishirilgan ovqat berilganini aytdi. U ko‘pgina non o‘rtaga to‘g‘rab qo‘yilganini aytdi», – deydi Abdurahmon Tashanov.
