«O‘zbekiston temir yo‘llari» ichki yo‘nalishlar uchun ham chegirmalar e'lon qildi

«O‘zbekiston temir yo‘llari» kompaniyasi Navro‘z bayrami nishonlanadigan 21—24 mart kunlari ichki reyslarga chegirmalar joriy etilishini e'lon qildi.

Chegirmalardan quyidagilar foydalanishi mumkin:

• pensionerlar, nogironlar, 1941—1945 yillardagi urush qatnashchilari va ularga tenglashtirilgan shaxslar — 50 foiz chegirma;
• maktab o‘quvchilari, kollej, litsey va OTMlar talabalari, IIV, Mudofaa vazirligi, DXX, Davlat soliq qo‘mitasi, Davlat bojxona qo‘mitasi va boshqa mahkamalar tizimidagi maxsus ta'lim muassasalari o‘quvchilari va tinglovchilari (guvohnomalar taqdim etilganda) — 15 foiz;
• oilalar (ikki kishidan — er va xotin, er, xotin va ularning 18 yoshgacha bolalari; 18 yoshgacha farzandi bilan ota yoki ona, nikoh to‘g‘risidagi guvohnoma taqdim etilganda) — 15 foiz;
• jamoalar (to‘rt va undan ortiq kishi) — 15 foiz.

Qo‘shimcha qilinishicha, «Afrosiyob» tezyurar elektropoyezdlarining barcha toifadagi yo‘lovchilariga 10 foizlik chegirmalar taqdim etiladi.

Bundan avvalroq Navro‘z bayrami munosabati bilan Uzbekistan Airways aviakompaniyasi ham ichki reyslarga chegirmalar e'lon qilgani haqida xabar berilgan edi. Shuningdek, «O‘zbekiston temir yo‘llari» xalqaro yo‘nalishlar uchun ham chegirmalar e'lon qilgan.

Bayram munosabati bilan o‘zbekistonliklar ketma-ket to‘rt kun dam olishi kutilmoqda.

Eslatib o‘tamiz, «O‘zbekiston temir yo‘llari» 1 martdan boshlab «Afrosiyob» tezyurar poyezdlaridan tashqari barcha mahalliy yo‘nalishda qatnovchi yo‘lovchi poyezd chiptalari narxini 20 foizga oshirishini e'lon qilgandi.